三冠美夢又近一步！新科聯賽盃冠軍曼聯，今晨喺足總盃16強以3比1反勝韋斯咸，昂然殺入8強。落後嘅曼聯再一次展現魔性，新人王加拿祖嗰球救命波相當關鍵。
相比聯賽盃決賽，曼聯今場正選陣容有6人輪換，包括先收起拉舒福特、卡斯米路同利辛度馬天尼斯。紅魔僅出半力，上半場韋斯咸攻勢較為入肉，換邊後卡斯米路落場，加強番曼聯中場控制，不過去到54分鐘，賓華馬射個世界波，韋斯咸領先。
坦克呢個時候冇得揀，換埋福爺入嚟大晒冷 ，卡斯米路入波雖被VAR推翻，但去到77分鐘，曼聯終憑角球攻勢，令阿古特擺烏龍扳平1比1。90分鐘，加拿祖喺禁區左路熨射，曼聯終於反先，補時再由費特埋齋，3比1晉級。
8強抽籤後，曼聯會喺主場對富咸，曼城就喺主場對般尼。另外兩場波係白禮頓對甘士比、錫菲聯對布力般流浪。照牌面睇，曼聯同曼城無疑係冠軍兩大熱門。賽事會喺兩個禮拜後上演。
至於今場波嘅關鍵先生加拿祖，今季只係第10次正選上陣，但佢4個入球當中，有3球係致勝球，坦克賽後亦大讚：「我賽前同佢講係時候更進一步，證明自己可以踢正選。加拿祖除咗有腳法同速度，最重要係有膽識。」
加拿祖冒起，西班牙《隊報》亦指，西班牙國家隊打算搶人才，力邀失意阿根廷嘅加拿祖「再轉會」，出戰3月底嘅歐國盃外圍賽。
點解話「再轉會」？事實上，加拿祖係喺馬德里出世，亦曾經喺馬體會及皇馬青年軍受訓，踢過西班牙U18，之後先因媽媽關係轉踢阿根廷。既然阿根廷主帥史卡朗尼，寧願揀踢美職嘅泰亞高艾美達，都唔畀加拿祖出戰世界盃，加拿祖踢番西班牙絕對唔奇。
