【足總盃】領先3球 輸番3球 幾乎被絕殺!曼聯靠12碼淘汰高地 坦克:捧足總盃唔算成功

入到決賽都要狂炳!周日英格蘭足總盃4強,曼聯對住英冠高雲地利,領先3球之下,竟然畀對手追和3:3,加時更幾乎輸埋,只靠互射12碼贏4:2晉級,5月25號繼續於溫布萊球場對曼城,上演上屆決賽翻版。

高雲地利英冠排第8,爭升班機會微乎其微,可以去到溫布萊挑戰曼聯,已係莫大成就。諗唔到更可以打出精彩足球,一度將曼聯逼向絕境,超強鬥志令人激賞,絕對係光榮出局。

曼聯上半場佔盡優勢,但主要功臣係中後場球員。前鋒拉舒福特、海倫入唔到波?唔緊要,達洛治23分鐘疊瓦式助攻,傳靚波去遠柱,防中麥湯米尼門前撞入開紀錄。

達洛治上半場好醒神,除助攻入波外,之後高雲地利一個必入波,又畀佢近門精彩解圍。呢頭冇被追和,轉眼曼聯喺45分鐘,又藉角球由中堅麥佳亞頂入,曼聯領先兩球完上半場。

換邊後曼聯開始收油,58分鐘,般奴費南迪斯近射省中對手入網,曼聯領先至3:0,以為大勝一場?但曼聯控制球賽能力實在太差,領先3球後學人控場放慢節奏,點知自曝其短,高雲地利球員保持高昂戰意喪逼,令賽事末段掀起高潮。

艾利斯森斯71分鐘先射成1:3,8分鐘後,奧哈拉再追多球,曼聯球員同擁躉終於識驚、嚇到腳軟。托普86分鐘射出靚波,睇怕必入可扳平,但被奧拿拿精彩救出。

曼聯真係極品,連失兩球都唔可以穩住陣腳,繼續騰晒雞,去到補時竟然再失波,雲比沙卡手球輸12碼,夏治胡禮補時5分鐘射成3:3,高雲地利奇跡扳平要加時。

加時上半場曼聯稍為控制番戰果,般奴費南迪斯勁射中楣底,彈出唔係彈入。加時下半場開波冇耐,麥佳亞由後場長軀直進,殺入高雲地利腹地,但最後射門被門將哥連斯救出。加時下半場曼聯又力弱,高雲地利豁咗出去,全攻求勝,117分鐘曾射門中楣,補時入波又因輕微越位食詐胡,曼聯逃過兩刧,要互射12碼。曼聯先有卡斯米路宴客,但高雲地利有兩名球員射失,紅魔12碼射贏4:2入決賽。

賽後坦哈格受訪言論,亦成為今場焦點之一:「今場波係一場難以置信嘅比賽,亦係一場好奇怪嘅比賽,我哋掌握75分鐘形勢,而另外15分鐘係要高度讚揚高雲地利嘅球員,同時,我哋嘅紀律都出咗問題……點都好,我哋連續兩年入決賽,我梗係想捧盃,但就算捧足總盃都唔算成功,我想贏得更多。」