師傅先下一城！英格蘭足總盃第四圈，曼城憑阿基一箭定江山，主場1比0淘汰阿仙奴，率先殺入16強，哥迪奧拿同阿迪達之間嘅師徒爭霸，由師傅哥帥先贏一仗。
由於之前聯賽改期，嚟到一月底，英超一、二哥先有機會首次交鋒，當然備受注目。阿仙奴目前喺英超領放，嚟到足總盃亦避重就輕，作出6個位置輪換，新兵杜沙特擔正，奧迪加特、沙列巴、辛真高、馬天尼利等先列後備。相對下，曼城陣容較完整，夏蘭特、奇雲迪布尼出任正選。
杜沙特竄擾力強，踢法具威脅，曼城守將史東斯喺上半場末段，就為咗攔截佢而導致自己受傷，半場互無紀錄，換邊後曼城射手祖利安艾華利斯登場，呢位阿根廷世界盃功臣，喺64分鐘遠射中柱彈出，基亞利殊再傳畀尼敦阿基妙射建功。
荷蘭國腳阿基，係名副其實「盃賽殺手」，上月聯賽盃對利物浦，又係佢攻入致勝球。哥迪奧拿當然錫到佢燶，大讚阿基攻守兼備：「阿基今季好神勇，佢今場對手係英超最有威脅嘅布卡約沙卡，阿基唔單止成功拑制佢，喺禁區爭頂亦冇失手。」
曼城晉身16強，連續6次對賽擊敗阿仙奴，而阿仙奴則自上年11月聯賽盃出局後，首次喺正式賽事輸波。不過，呢對英超一、二哥，主戰場當然喺聯賽度，嚟緊阿仙奴會喺2月16號凌晨主場鬥曼城，次循環就喺4月27號上演。
