鋼門都有失手時！利物浦喺英格蘭足總盃第3圈，主場只能同狼隊踢成2:2，喺頻密賽程底下，嚟緊仲要整多場重賽，相當惡搞。
新兵加普粉墨登場，達雲紐尼斯亦難得有士哥，可惜喺VVD養傷一個月之下，巴西鋼門艾利臣比加犯下嚴重錯誤，慘成利物浦未能提早晉級嘅關鍵。
利物浦今場不敢怠慢、強陣出擊，荷蘭新兵加普處子登場，門將亦起用艾利臣比加，而唔係盃賽門將基利靴，但偏偏去到26分鐘，就係艾利臣將個波傳畀狼隊前鋒古亞迪斯，古亞迪斯亦唔客氣，將個波送入網。
紅軍積極反撲，達雲紐尼斯完半場前窩利扳平，52分鐘，輪到狼隊犯錯，沙拿建功反超前2比1，不過黃喜燦喺66分鐘近門剷入追平2比2，尾段狼隊更有入波爭議性被判詐胡，最終雙方打和、需要重賽。
賽後利物浦領隊高普，就幫艾利臣講好說話：「係，呢個失波係唔應該，但艾利臣之前救過我哋好多次，同埋我哋控制戰局，只係贏唔到波。」
至於狼隊主帥盧柏迪古，賽後竟然衝入房，搵球證馬德利理論：「我哋睇過慢鏡，嗰球波根本係錯誤判決，我哋冇越位，狼隊值得贏波晉級。」
另一支Big 6熱刺，主場面對英甲樸茨茅夫，全場佔約七成控球權，但進攻質素唔掂，18次埋門得1次中目標，就係哈利卡尼嘅入球，最終熱刺亦以呢球波，1:0淘汰樸茨茅夫。
同晚最大冷門，係英甲錫周三，主場以2:1擊退豪門紐卡素，跌到一地眼鏡碎。
