【足總盃】孫仔缺陣影響大 熱刺靠樸羅世界波贏般尼;連續22場有士哥 普帥挑戰肥安紀錄

英格蘭足總盃進入第3圈,英超球隊加入戰團,尋晚就有兩場全英超對決,熱刺主場以1:0絕殺般尼,而賓福特同狼隊就各一言和。

論矚目程度,當然首推排第5的熱刺,迎戰尾2的般尼一戰,尤其隊長孫興民已離隊征戰亞洲盃,熱刺進攻組合變化如何,自然備受關注。一如大家所料,李察利臣做番正中鋒,左右兩翼為古路錫斯基、賓倫莊遜,拜恩基爾先列後備。

熱刺質素較高,取得大部份控球權,67%控球率,7次射門3次中目標,但創造力同把握力不足,尤其李察利臣又打回原形,未能對般尼構成重大威脅,去到78分鐘,右後衛樸羅喺前場搶到波後,再推順起腳轟入世界波,1:0淘汰般尼,殺入足總盃第4圈。

24歲嘅西班牙國腳樸羅,今季英超已有6次助攻,但呢場先係首次入波,不過一嚟就係致勝世界波,都叫補番條數。但睇番熱刺今場合共有16次射門,但只入1球,可見孫興民缺陣,影響真係唔細。

不過熱刺都叫做有好消息,今場係教頭普斯迪高路第22場比賽,熱刺每場都有波入,只要嚟緊6場都有士哥,就可以平到安察洛堤2009/10球季教車路士、首28場都有波入嘅紀錄。

另一場大戰,狼隊開波9分鐘就踢少個,祖奧高美斯因粗野攔截被逐,但作客落後嘅情況下,仍能以1:1逼和賓福特,兩軍須擇日重賽。而富咸主場則以1:0淘汰英冠洛達咸。