孫仔終於破入球荒！足總盃第四圈，幾支熱門球隊都順利晉級，當中包括熱刺。熱刺憑孫興民梅開二度、新兵丹祖馬建功，作客3比0大勝普雷斯頓，睇完呢場波，干地肯定超開心，因為球隊鋒線有幸福的煩惱，而且越嚟越嚴重。
熱刺今場收起身體不適嘅哈利卡尼，孫興民改踢正箭頭。孫仔上次為熱刺入波，已經係舊年10月，嚟到尋晚，佢終於入波，仲要一整就整兩粒，佢分別喺50分鐘同69分鐘建功，加上維拉利爾借用嘅荷蘭前鋒丹祖馬，後備上陣即有斬獲，熱刺大勝普雷斯頓3比0晉級。
今季27戰僅入8球，效率同上季比係差咗唔少，不過孫仔今場總算挽回番多少自信：「我真係好需要入波去拎番信心，呢點好重要。不過最重要嘅，係幫熱刺晉級，希望嚟緊愈踢愈順啦。」
熱刺三叉戟體系中，哈利卡尼位置不可撼動，古路斯夫斯基今季弗到爆，淨番嗰一個位，已經有孫仔同李察利臣爭，之後仲要加埋地標戰即入波嘅丹祖馬，競爭非常激烈。
熱刺領隊干地，賽後亦有淺談吓佢條靚鋒線：「入波之後，我肯定孫興民會更有信心，至於丹祖馬有好大潛力，前面3個位置佢都踢得，而且今場入波，對佢嚟講絕對係個好開始。」熱刺下場回師英超，2月6號凌晨主場對曼城。
同晚，曼聯憑卡斯米路入兩粒及費特埋齋，主場以3比1輕取雷丁，強勢殺入16強。
