'

【足總盃】世盃後大爆發!連續5場建功 領曼聯力挫愛華頓!福仔:我要幫紅魔捧盃!

奧脫福核心歸位!拉舒福特再次以一己之力創造3個士哥,助曼聯喺足總盃第3圈,以3:1力剋愛華頓,強勢晉級。

今場係曼聯喺世界盃後第5場比賽,呢5場波曼聯除咗全部贏晒,前鋒拉舒福特更場場有波入、兼交出2次助攻,成為紅魔鋒線嘅絕對核心。

昨晨曼聯繼續強陣出擊,馬迪爾單箭頭,拉舒福特、般奴費南迪斯、安東尼支援,開波4分鐘,拉舒福特左路突破後傳去遠柱,安東尼搞掂。14分鐘,門將迪基亞派膠被通坑渠,愛華頓中堅高亞迪執雞追和1:1。

下半場高亞迪變罪人,將福仔嘅傳中波踢入自己龍門,愛華頓再次落後。之後迪馬雷格雷曾勁射入網,但因越位被判無效。

補時階段,加拿祖博到12碼,福仔主射入網,奠定3:1勝局。福仔亦成為2012年4月朗尼後,首位連續7次喺奧脫福都有波入嘅球員,強勢殺入第4圈。

福仔賽後受訪,話目前感覺返晒嚟:「目前我感覺到自己喺最佳狀態,有入球,亦可創造機會。希望今季入到盃賽決賽,然後幫曼聯捧盃而回。」

前曼聯隊長堅尼,亦大讚拉舒福特有料到:「講真,以拉舒福特嘅能力,佢有近期嘅表現係好正常,呢個亦係我哋期望見到嘅拉舒福特。」