世界盃E組首輪，日本隊以2:1反勝德國，令經典漫畫《足球小將》一個虛構故事實現。已經62歲嘅高橋老師表示，漫畫中描繪場景成真，其實自己根本發夢都未諗過。
喺《足球小將》，戴志偉曾經帶領日本喺世少盃決賽，擊敗當時嘅西德隊，捧得冠軍。估唔到34年之後，漫畫劇情成為現實，仲要係喺世界盃舞台上面，日本隊面對德國隊，最終以2-1逆轉取勝。
如今預言成真，高橋陽一坦言：「我喺漫畫中描繪好多同德國大戰嘅情節，對呢一戰注入咗好多心思。德國係我一直以來要追趕嘅目標，亦係我內心中嘅足球代表，所以我好期待呢場現實對決。無論漫畫定現實，日本球員都全力發揮，最終打敗德國，超開心！」
講到《足球小將》嘅日德之戰，高橋陽一話：「德國有日耳曼精神，日本有大和魂，所以漫畫入面，我冇寫德國隊輕視日本隊，日本隊精神上亦冇被德國隊擊敗，頑強防守到最後，係一場精神同精神上嘅碰撞。」
上世紀80年代創作《足球小將》漫畫嗰陣，高橋陽一曾經去過德國取材，當時日本史上第一位旅歐球員、曾效力德甲科隆嘅奧寺康彥專門陪同：「當我去德國嗰陣，奧寺康彥帶我參觀科隆市，佢係一個偉大球員，我好尊重佢。」
高橋陽一更感慨道：「上世紀80年代，亦即我去德國嘅時候，日本甚至連職業聯賽都未有，當我參觀完德國球會，就覺得日本完全落後，根本唔可能參加世界盃。但隨後，佢哋能夠短時間內踏上世盃舞台，依家更戰勝德國，我發夢都冇諗過。」
「我喺漫畫中所描繪嘅場景，居然成為現實，足球喺日本能夠咁興盛，不得不令我再次感歎，佢係一項藴含驚人力量嘅運動，能夠描繪出呢個漫畫，我真係好幸福！」
其實，高橋陽一老師，日本足球及熱愛足球嘅球迷亦都要感謝你，《足球小將》令讀者明白到，喺逆境中努力實現夢想，係一件無比快樂嘅事。
