阿古路退役，普遍預期國際米蘭射手拿達路馬天尼斯，會成為美斯拍檔，協助球王衝擊終極世界盃。結果出人意表，由曼城小將祖利安艾華利斯跑出。
4強對克羅地亞梅開二度，艾華利斯以22歲316日，成為繼球王比利之後，喺世界盃4強或決賽起孖嘅最年輕球員。
著名足球記者Fabrizio Romano，喺社交網分享一張艾華利斯同美斯嘅舊合照；12年前嘅小艾華利斯受訪，話自己偶像係美斯，而同美斯一齊踢世界盃，就係自己最大嘅夢想。
「美斯係我哋一家人嘅偶像，我同我嘅兄弟都好鍾意佢。我自細嘅夢想，就係同美斯一齊踢世界盃。」
自從阿古路退役後，阿根廷主要由拿達路馬天尼斯擔任正選前鋒，但佢今屆賽事頭兩場波都冇料到，最終喺第3場分組賽對波蘭被貶後備，由曼城後備前鋒艾華利斯頂上。
艾華利斯得到首度正選上陣嘅機會，對波蘭一戰就有士哥；去到16強對澳洲又建功，到4強先為美斯博到12碼，自己更梅開二度，助阿根廷相隔8年後再入決賽。
美斯賽後都盛讚呢位當年嘅小粉絲：「佢比所有人都要突出，能衝能撞！」。官方數據指艾華利斯今場衝刺跑動達66次，全場最多，難怪美斯都要話頒個MVP畀佢。
祖利安艾華利斯喺阿根廷一個小村莊長大，由於冇乜娛樂，佢都係同哥哥、朋友通山跑，又或者係周圍去街場踢波。有一次踢波，當時得4歲嘅艾華利斯被笑或者蜘蛛仔咁，而呢個外號一直叫到大，艾華利斯認為蜘蛛生命力強，好鍾意呢個外號。
艾華利斯喺河床成名，舊年協助河床贏得阿甲冠軍，佢喺慶祝嗰陣就戴上蜘蛛俠頭套，做埋蜘蛛俠手勢慶祝。
正如蜘蛛俠金句：能力越大，責任越大，去到決賽，艾華利斯要展現更強大能力，為自己、為偶像，完成足球歷史使命。
