日本奇跡反勝德國，其中一個功臣，肯定係三笘熏，呢位効力英超白禮顿嘅攻擊中場，性格沉實低調，以實力說話，同佢一個相當有名嘅鄰居，作風非常相似。
日劇《孤獨的美食家》已播放至第10輯，扮演男主角井之頭五郎嘅松重豐，本來係萬年配角，亦因為《孤》劇而爆紅。最近松重豐接受日本足總邀請，拍攝支持國家隊影片，講出原來佢曾經係三笘薰鄰居，而且同三笘家關係良好，細細個嘅三笘薰，更經常會到松重豐屋企玩，最鍾意坐喺梳化打機。
松重豐話，大約20幾年前左右，三笘家就同佢住喺同一大廈嘅相鄰單位，當時三笘薰嘅媽媽出街時，三笘薰就會託付喺松重屋企照顧。松重指，大約6年前搬屋後，仍然同三笘嘅父母有聯絡。
松重話，對當時三笘薰嘅感覺，係一個好聰明嘅細路仔，小學時已可以好有自信做回應。當時佢哋居住嘅川崎市，足球好受歡迎，三笘薰入選川崎前鋒青年軍後，已被睇好可以有極佳發展。
三笘之後入讀築波大學，松重以為呢個細路會以學業為先，估唔到佢之後會成為日本國腳。睇到到昔日喺自己屋企打機嘅細路仔，依家挑戰世界盃，感覺就好似親戚一樣，必定要全力支持。
松重又表示，自己對足球嘅認識唔多，因此向足球節目主持請教。佢得知三笘嘅實力，並知道多數時間只能喺比賽末段上陣，松重就希望日本隊可以畀舊鄰居多啲正選上陣嘅機會。
三笘薰技術毋庸置疑，今季喺白禮頓，只要有機會落場，喺左路都能發揮威力，對德國之役後備上陣，正係由佢策動攻勢，放靚波畀南野拓實射門，再由堂安律執死雞扳平。
講攻擊技術同個人突破，三笘薰公認為目前日本第一人，領隊森保一以往戰術較保守，大部份時間將佢列為後備，作為最後武器。日本周日對哥斯達黎加，贏波就可以話出線在望，相信三笘薰會有正選機會，發撣個人強攻本錢。
