荷蘭領隊尹戈爾，70歲，受前列腺癌魔侵擾，看透世情，更何況勝負？今次世盃決賽周，荷蘭球員入波後瘋狂慶祝，方仗依然氣定神閒，坐喺後備席紋風不動。
今年4月，尹戈爾宣布患癌，之前每次完成國際賽後，當晚都要入院治療，避免畀球員知道，影響演出，已接受超過30次化療。
七十從心所欲，堅持帶隊參戰決賽周。歷來帶領荷蘭踢過11場世盃決賽周賽事，90分鐘內8勝3和未輸過。回顧一生領隊生涯，高山低谷乜都見盡，係未攞世界盃啫。
就算唔得，都冇遺憾，份CV靚到得人驚，阿積士年代，提拔施多夫、戴維斯、雲達沙、古華特等巨星，加上購入奧華馬斯、列馬倫，成就一代皇朝。1995年擊敗如日中天嘅AC米蘭，捧歐聯冠軍，走上人生巔峰。
轉教巴塞隆拿，兩奪西甲冠軍，更重要貢獻係日後成為核心嘅佩奧爾、沙維，都係由尹戈爾提升上一隊。
之後跌跌碰碰，兩度教荷蘭、重返巴塞、拜仁、曼聯，未能再現輝煌，其中2014-16年執教紅魔，更被評為災難，戰術落後、性格頑固，幾難聽都有。
玩開有癮，見佢經常眉頭深鎖，脾氣差易嬲，專賣走唔聽話嘅球員，方丈之名，由此而起。當日戲謔花朶，如今代表功力深厚、萬佛朝宗？曾經天上人間，亦曾無間地獄，早已笑罵由人，否則點可以你有你慶祝，我自我入定？
抖咗幾年，2021年8月再出山，帶住星光黯淡荷蘭，冇人睇好，依家打入8強，方丈足球生命，仲可以行多幾步？周六凌晨16強對阿根廷，會唔會係終結一夜？抑或會功德圓滿？
得道方丈，仍會起心動念，只為人情。邊個咁有魅力？咪就右翼衞杜費斯囉！
3場分組賽，荷蘭演出備受批評，只有國際米蘭右翼衞杜費斯幸免於難。去到16強見真章，淘汰美國一役，杜費斯兩傳一射，真正世界級水準，賽後記者會，方丈忍唔住錫咗愛將一啖。
更感人嘅係，來自一個賽前記者會，一個非洲年輕記者獲得發問機會：「我入行時間唔耐，冇問題想問，只係想表達我細細個已經係你擁躉，好開心可以見到你本人。」
方丈一時無言以對，停頓一下後：「呢個時刻好特別，記者會後我要擁抱你。」散會後佢兌現承諾，同粉絲擁抱。年輕記者合照時話：「我哋係尹戈爾軍團！」老帥望向對方：「係，你係其中一位成員。」
