星期六女子世盃由朝打到晚，美國女足、英格蘭女足、日本女足、中國女足輪住登場，兩位殿堂級嘅世界冠軍球星阿歷絲摩根(Alex Morgan)同熊谷紗希(Saki Kumagai)，雖然喺唔同時段分途出擊，不過曾經命運交錯嘅兩人，都抱住重溫世盃冠軍滋味嘅夢想進發，絕對係女子足球嘅模範生。
2011年女子世盃決賽，係阿歷絲摩根同熊谷紗希兩位傳奇誕生嘅舞台，22歲嘅阿歷絲摩根係當年美國大軍最年輕球員，20歲嘅熊谷紗希亦係呢隊神奇日本女足嘅王牌新星。
呢場經典決賽，阿歷絲摩根喺決賽入波，但美國女足同日本女足激戰120分鐘打和2:2，去到互射12碼決勝，熊谷紗希射入決定勝一球，為日本女足歷史性捧走世盃冠軍。
阿歷絲摩根經歷決賽之痛後平步青雲，連續2屆(2015、2019)帶領美國女足稱霸世盃，超過200次國家隊上陣紀錄、121個國際賽入球，34歲嘅佢今屆以全新「媽媽」身份亮相，3歲囡囡Charlie成為前進動力，阿歷絲摩根老練表示：「今次係我第1次以媽媽身份踢世盃，我想代表所有媽媽運動員，我覺得好神奇、亦好興奮。」
作為日本女足今屆唯一一個2011冠軍成員，32歲嘅熊谷紗希無疑亦係日本一眾年輕球員心目中嘅「媽媽」，佢為里昂女足喺女子歐聯「5連冠」、上季為拜仁慕尼黑女足贏德甲冠軍嘅成功經驗，都會係球隊最寶貴財產。來季將轉投羅馬女足的熊谷紗希，決賽周前表示：「我想繼續擔任隊長，成為所有人都希望追隨嘅人。」
阿歷絲摩根將帶領星光熠熠嘅美國女足爭逐冠軍，希望成為史上第1支喺世盃完成3連冠嘅球隊，E組首戰面對弱旅越南女足，阿歷絲摩根有望繼續提高佢喺世盃嘅入球數字；
至於日本女足近年光輝不再，熊谷紗希坦言唔會定下任何目標，只希望喺每一場盡力爭勝，C組首戰對贊比亞女足夢想啟航。
