要數今屆女子世盃最矚目球星，西班牙女球王佩迪拉絲(Alexia Putellas)肯定係最吸睛人物，呢位連續2屆女子金球獎得主，無論技術、智慧、體型同風格都係獨一無二，決賽周前更經歷「退隊風波」同嚴重膝傷，幾乎同今屆世盃講再見。
不過，西班牙女足星期五喺C組首仗對哥斯達黎加女足，佩迪拉絲將會領軍再戰世盃，失而復得嘅機會更見可貴。
半年前佩迪拉絲經歷生涯最大危機，因膝傷正處10個月休養期嘅佢，同15名國家隊隊友因為不滿足總同教練佐治維達(Jorge Vilda)嘅領導，一度退出國家隊以示抗議，直到今年佩迪拉絲決定重返西班牙，亦間接令部份退隊球員回心轉意，西班牙女足今屆世盃得以強陣出擊，佩迪拉絲嘅影響力非同凡響。
29歲嘅佩迪拉絲向來以技術、體能兼備見稱，上年夏天女子歐國盃前經歷嘅恐怖膝傷，對佢嚟講係前所未有嘅打擊，不過呢位天才中場決心復出，成功喺上季季尾重返球場，雖然只喺6場比賽後備上陣踢咗120分鐘，包括喺女子歐聯決賽後備上陣，協助巴塞隆拿女足反勝禾夫斯堡女足奪冠，為西班牙女足出戰世盃注下強心針。
佩迪拉絲喺近3屆女子歐聯得到2冠1亞，世界足球小姐同女子金球獎亦連續2年「冧莊」，遺憾係西班牙女足喺國際大賽仍未有任何佳績，上屆世盃入16強已經係史上最佳成績。
西班牙女足今屆喺C組鶴立雞群，同組哥斯達黎加女足、贊比亞女足同日本女足都唔係佢哋對手，佩迪拉絲有機會借分組賽慢慢提升狀態。
佩迪拉絲喺決賽周前特別將頭髮染成粉紅色，搶眼嘅全新造型，似乎寄託佢喺今屆世盃大放異彩嘅決心。
