'

【說好世盃故事】15歲寫洋蔥千字文 勸美斯留低!安素費南迪斯 獲球王助攻回信

世界盃C組,原本首名大熱嘅阿根廷,首戰爆大冷輸畀沙特,出線頓現危機,次仗形勢亦相當驚險,好彩美斯同安素費南迪斯挺身而出,以2:0擊敗墨西哥,最後一輪對波蘭,贏波即肯定出線,命運總算掌握喺自己手中。

美斯、安素呢對拍檔,絕對係貨真價實嘅偶像與粉絲組合。

時間返回2016年,美洲國家盃決賽,阿根廷同智利鬥到互射12碼階段,當時仍未能帶領阿根廷封王國際大賽嘅美斯,背負住巨大壓力,最終射失12碼,失落冠軍。

2014年世界盃已僅獲亞軍、加埋美洲盃飲恨,被萬千球迷嘲諷,當中包括阿根廷Fans,壓力爆煲嘅美斯終於崩潰,宣佈退出阿根廷國家隊。

當年只得15歲嘅安素費南迪斯,正喺河床青年軍學法,偶像嘅退役,令正喺度奮戰力爭上游嘅安素大受打擊,於是喺facebook寫咗篇千字文,感情真摯、而且體諒球王處境,希望偶像留低。

「我估你每朝起身,望吓塊鏡,就已經感受到自己背負住4000萬人嘅期望,而呢班人,只識得要求你表現完美,根本係荒謬……講到尾,你畢竟只係一個人……各位阿根廷人,你問吓自己,你對自己嘅要求,及得上你對美斯嘅要求嘅1%嗎?」

「Lionel,你想做就去做吧,但都希望你考慮留下來,不過,若留下來,也請享受足球嘅樂趣,依家係佢哋搶走你嘅快樂……每次見到你穿上阿根廷戰衣比賽,令我覺得好自豪……對唔住,請原諒我哋(阿根廷人)。」

美斯有冇睇到封信就唔知,但佢上場就有個助攻畀呢位當年嘅小fans。安素費南迪斯唔止斬獲世界盃入球,仲獲偶像飛撲埋嚟慶祝,呢一刻對佢嚟講,已經勝過一切回覆了。