法國左閘兄弟盧卡斯同菲奧，喺單親家庭長大，同為足球員嘅老竇18年前走咗佬，兩兄弟同媽媽Laurence PY自小相依為命，感情極度深厚，但18年後，老竇竟然再次「蒲頭」，並揭開失蹤真相……！？
兩兄弟嘅老竇叫桑靴南迪斯（Jean-François Hernandez），目前已經53歲，球員生涯時司職中堅，踢過圖盧茲、馬賽、華歷簡奴同馬體會，同費蘭度托利斯做過隊友，2002年掛靴後，喺04年，一夜間突然拋妻棄子，據傳係因為負債累累，往後18年，桑從來冇搵過兩個仔，就好似人間蒸發一樣。
法國傳媒都好好奇，桑靴南迪斯始終係職業球員，都叫有一定知名度，佢匿咗去邊，等其他人完全搵唔到佢？係咪真係因為錢？又點解咁狠心連對囝都唔理？於是法國《隊報》就開始尋人行動。
桑靴南迪斯本人就搵唔到，但就搵到佢身邊人。據悉，桑靴南迪斯當年走佬後移民去泰國，桑嘅堂兄弟Bruno Saliba就話：「其實係佢哋（盧卡斯同菲奧）媽媽逼佢走！桑根本冇諗過唔要一對囝囝！」
桑嘅前女友Sonia Moldes亦話：「我知桑成日都想見番兩個囝囝，甚至通電話都好，可惜佢哋媽媽唔畀。我哋搵過律師幫手，可惜唔成功。桑根本係錫對囝囝多於自己，我覺得佢哋（盧卡斯同菲奧）要知道真相。」
現任PSG主帥加迪亞，曾經同桑靴南迪斯喺圖盧茲及馬賽做隊友，長達近4年，加迪亞都話：「我認識嘅桑，係一個好照顧家庭嘅人，佢出咗事，我都好傷心，佢點解唔搵我幫手？我想同佢見面，睇吓有咩幫到佢。」
更神奇嘅，係《隊報》搵到桑靴南迪斯嘅囡囡，Lauris Hernandez，佢係桑同現任妻子喺泰國所生。「爸爸一個人睇國家隊比賽嗰陣，幾乎喊足全場。佢好掛住佢哋，好想見面，就算傾一次電話都好。」據指，Lauris同桑已經由泰國搬番嚟法國，目前住喺波爾多附近。
喺2019年，盧卡斯靴南迪斯曾經做過訪問，話兩兄弟感情勁好嘅主因，就係因為冇咗老竇：「我哋好細個就要互相依靠，同媽媽相依為命，所以呢份感情係不可分割。依家我哋長大成人，但爸爸一次都冇搵過我哋，我哋唔知佢生定死，亦唔想去理佢依家做緊乜。」
