法國以2:1力挫英格蘭，都多人都盛讚基奧特老而彌堅，再早幾場就力撐麥巴比「世一」，呢對前鋒組合固之然超勁，但其實佢哋背後有位中場大師發功，佢就係4年前嘅冠軍翼鋒，如今轉踢中場嘅基沙文。
兩年前嘅國際賽期，迪甘斯喺食緊早餐嗰陣，無啦啦同基沙文講：「你可以踢得後啲，無論視野、工作效率、體能同智慧，我認為你都具備成為偉大6號球員嘅條件。」當時基沙文聽完就算，估唔到兩年後，6號位未做到，但因為普巴、尼干古等先後受傷，就頂上踢8號位。
基沙文喺贏英格蘭後受訪，講到迪甘斯嘅時候，佢都有形容兩師徒嘅關係，係令佢墮後一格表現更出色嘅主因：「係我欠佢（迪甘斯），我為法國國家隊付出一切，既為咗孭得起呢件波衫，亦都係為佢。佢一直信任我，我每一個動作、每一場比賽，就係我送畀佢嘅多謝。我希望佢為我感到驕傲。」
迪甘斯真係當基沙文好似親生仔一樣。迪甘斯過去71場比賽，基沙文每場都有份踢，呢個紀錄的確難以置信。
尤其自從2019年轉投巴塞隆拿後，基沙文狀態一沉不起，即使之後重投馬體會，表現好番啲，但畢竟已經31歲，狀態體能亦難以重返巔峰，邊路爆破、突入禁區嘅鏡頭比起以往皇家蘇斯達、馬體會時期，已經少咗好多，但迪甘斯仍然向佢投以信任一票，令唔少人都提出質疑。
上屆世界盃，基沙文係絕對主力兼球壇大紅人，拍住當時啱啱冒起嘅麥巴比，斬獲4個入波2次助攻，助法國國家隊封王；4年過去，法國鋒線依然係越老越勁嘅基奧特、已上位成為超級巨星嘅麥巴比，另外加個奧士文尼迪比利，如非普巴、尼干古受傷，基沙文的確好難搶到正選。
不過塞翁失馬，基沙文今屆改踢中場越戰越勇，上場對英格蘭交出兩個助攻，成為法國晉級嘅關鍵功臣，用表現嚟報答迪甘斯嘅信任。
