威爾斯上場以1:1逼和美國，救世主除咗搏到12碼再入埋嘅加里夫巴利，仲有另一位無名英雄：後備登場嘅基化摩亞。
現年30歲嘅基化摩亞，身高達1米96，制空力超強，上場亦全靠佢後備落場改變戰局，令威爾斯有番停到波嘅Target Man，由被圍攻變成主動出擊，最終逼和對手，連上場MVP巴利，都話真正嘅MVP其實係摩亞。
基化摩亞係傳統英式柱躉中鋒，過人技術好一般，但勝在控到波、制空力強，而且配合度極高，Hold住個波等隊友突入、二傳係佢嘅最大賣點。
由低組別同業餘聯賽踢起，基化摩亞嘅收入自然冇保證，曾經做過救生員幫補，由2012年捱到依家，直到今季先首戰英超、效力般尼茅夫，今季15場聯賽暫時入4球，表現唔曳。
其實摩亞早喺上年歐國盃決賽周，已經成為新聞紅人，威爾斯對瑞士嘅分組賽，摩亞爆缸後包住個頭頂硬上，之後更成為救世主，用爆晒缸嘅頭頂入救命波，帶領球隊晉級16強，一戰成名、成為不屈鐵漢嘅代名詞。
不過，呢位國家英雄爆紅後，隨即被翻舊帳。2019年，當時27歲嘅摩亞仲係踢緊英甲班士利，亦只曾代表英格蘭C隊1次，勉強有中國血統（媽媽個外公係中國廣東人），去到6月18號，摩亞被踢爆去咗中國，同北京國安傾轉籍，然後加盟一事，可惜單嘢唔知點解未能成事，否則中國隊應該可以出戰世界盃，幸好他們踢得很好，已經盡力啦，以後好好加油，有機會贏的。
經歷過呢件事後，早已選咗摩亞入訓練隊嘅威爾斯，亦決定徵召佢為大國腳，10月，摩亞終於為威爾斯踢地標戰，然後先有之後爆頭入波、改變戰局嘅故事。
今晚B組早場對伊朗，摩亞料將正選披甲，對伊朗狂轟猛炸。目前B組形勢，英格蘭3分，威爾斯、美國1分，伊朗0分。
