A組表面睇，荷蘭相對齊腳，又有名帥尹戈爾出山領軍，好似一枝獨秀咁，但尋晚對住冇文尼嘅塞內加爾，踢落完全唔係想像中嗰回事，如非處子門神洛柏治表現神勇，隨時輸埋都仲得。
荷蘭最終贏2:0，關鍵除咗係尹戈爾嘅調動，釋放卡普，但落場嘅始終係球員，更重要因素係兩軍門將嘅分野。
艾度亞文迪今季喺車路士失寵，今場亦充份解釋咗原因，一球出迎時間有落差，另一球如撲向橫邊亦可避免失波，兩球都真係可以再做好啲，尤其今場荷蘭門神之穩健，更顯得文迪未如理想。
荷蘭門將洛柏治，今場只係第一次為國家隊正選披甲，但無論神態、提場、指揮同撲救，根本完全唔似係國家隊新丁，呢點可能同佢見慣風浪有關。
28歲嘅洛柏治目前只係效力荷甲海倫芬，但咪以為好失禮，事關海倫芬除咗係佢母會，而更差更壞嘅情況，洛柏治都曾經遇過，幾經艱辛先能夠「愛回家」。
呢位身高逾2米、今屆世界盃最高嘅球員，早喺2013年已經喺海倫芬出道，但一直冇機會上陣，之後轉投NAC比達，4季只曾披甲6次。去到2018年，洛柏治轉戰意乙尋求突破、加盟霍治亞，可惜同樣未獲正選之餘，更被黑手黨搶走架車，要畀錢贖番……當季，霍治亞降班並拒絕喺意丙作賽，宣佈散班……
外流埋都搞唔掂，洛柏治決定返番荷蘭搵工，卒之畀佢搵到加盟荷乙多德勒支嘅機會，但又係冇正選，同球會解約後，2020年6月開始失業接近一年，老婆同屋企人都提議佢有體能有身高，不如轉行當差啦，但洛柏治堅持佢嘅足球事業，到今年年初先喺伊高斯落班，意外打正選，仲憑出色表現幫球隊護級成功。
今季季前，洛柏治獲母會海倫芬招手，輾轉折騰近10年，終於「愛回家」擔任正印門將，並獲得尹戈爾垂青，入選埋荷蘭國家隊，更神奇係爆冷力壓另一位「坎坷門神」柏斯維亞，獲得世盃地標戰，而佢亦以表現證明，尹戈爾嘅眼光真係唔講得笑。
