巴西球星，出身大多相似，畢竟喺巴西，好似卡卡咁來自中產家庭嘅人，其實係少之又少。上仗入兩球、協助巴西擊敗塞爾維亞嘅李察利臣，同大多數國家隊隊友一樣，來自貧民窟，唔同嘅係，佢比其他人更接近罪惡同死亡。
李察利臣自少喺巴西東南部Nova Venecia長大，呢度係巴西著名嘅貧民窟同罪惡溫床，黑幫橫行，黃賭毒瓣瓣齊。屋企有五兄弟姊妹，父母長期離異，李察利臣身為長子，好細個已經幫補家計，幫媽媽賣朱古力、賣雪糕、幫手洗車等等。
「我好多朋友都去咗販毒，佢哋可以喺好短時間賺到好多錢，不過我冇羨慕，因為我知道咁做係唔啱，我媽媽管教好嚴，佢不斷灌輸我販毒等天收嘅訊息，所以我幫佢手賣吓嘢、洗吓車就好。」李察利臣喺泰晤士報專訪中咁講。
你唔搵麻煩，麻煩亦會嚟搵你。14歲嗰年，李察利臣已經開始有鬍鬚，有次佢同班朋友喺街上面踢波，曾經誤闖毒窟，有一名毒販誤以為佢帶住班童黨嚟偷毒品，仲用枝槍指住佢個頭：「我好驚，我以為自己玩完喇，好彩佢淨係話如果再見到我哋，就會毫不猶豫咁開槍。」
李察利臣逃出鬼門關之後，除咗唔敢再去嗰條街，亦更加意志堅定，要用足球去改變人生，無論啲朋友點樣勸說，佢都唔會因為搵快錢而販毒。
當然，技術唔算太細膩嘅李察利臣，試腳之旅並唔順利：「拒絕我嘅球會，多到我一對手都數唔晒，試埋最後今次，我已經準備好放棄，認真去搵份工，我嘅錢，亦只夠買一張機票去Belo Horizonte（阿美利加明尼路嘅所在地），如果衰咗，就冇錢返屋企㗎喇。」當年李察利臣係17歲。
踏進職業球員門檻後，李察利臣總算一帆風順，之後跳去富明尼斯、屈福特、愛華頓，再到依家嘅熱刺。
值得講番嘅係喺屈福特，李察利臣遇上佢嘅恩師馬高施華。2017年，只得20歲嘅李察利臣加盟屈福特，頭13場入5球，不過到咗英超完季，李察利臣踢足38場，入球同樣只係5球。不過馬高施華對李察利臣絕對信任，完季後跳槽，亦用5000萬鎊帶埋李察利臣去愛華頓，改變佢嘅人生。之後嘅故事，大家都知了。
喺巴西，幾乎所有9號仔嘅偶像都係朗拿度，李察利臣亦唔例外，佢除咗剪過經典福頭，亦同樣以英文R字開頭，令唔少球迷覺得佢就係新「R9」。
上仗分組賽，李察利臣入兩球，其中有一球係超靚車身金球，被評為今屆最靚入波，沒有之一。今晚對瑞士，呢位「R9」會唔會又有佳作，嚇球迷一跳？
