摩洛哥歷史性殺入世界盃4強，令絕大部份球評家大跌眼鏡，一隊冇乜星、一向冇乜成績嘅非洲球隊，憑啲咩可以走到嚟4強？如摩洛哥主帥利格古所言，兩個字：發夢！
資深啲嘅球迷，提起世界盃嘅非洲球員，不期然會閃過米拿嘅跳舞雄姿。1990年，喀麥隆爆大冷殺入世界盃8強，成功創造歷史，之前輪到2002年塞內加爾嘅迪奧夫、2010年加納嘅基恩，但佢哋都係去到8強止步，嚟到今屆，終於有所突破，摩洛哥一舉殺入4強，譜寫該國歷史、以至非洲足球新篇。
3個月前，47歲嘅利格古接手摩洛哥，重召薛耶治，憑佢嘅個人魅力，平定更衣室內亂，目標一致咁向「夢」進發。
比起日本擊退兩支世界盃冠軍，摩洛哥嘅分組賽之路亦相當燦爛，先賽和上屆亞軍、現於另一邊線殺入4強嘅克羅地亞，清脆以2:0擊敗上屆季軍比利時、最後一戰再勝加拿大，16強以12碼射贏前世界冠軍西班牙、8強再力退2016歐國盃王者嘅葡萄牙，呢條晉級之路，荊棘滿途、含金量十足。
更重要嘅，係即使計埋對西班牙嘅互射12碼，佢哋5戰只失1球，仲要係烏龍波，從來未被對手轟破大門，相當誇張。
喺8強贏咗葡萄牙之後，利格古受訪嗰陣，發表咗不亢不卑嘅講話：「對後代嚟講，今屆世界盃係好重要，因為我哋證明咗，一支非洲球隊亦可以入到4強、甚至決賽……3、4場比賽前，有人問我贏唔贏到世界盃，我話點解唔得？我哋既然可以發夢，點解唔去發夢？如果你唔去發夢，你就永遠都得唔到想要嘅嘢。發夢唔會花費你一分一毫。」
今屆3次當選最佳球員嘅門將耶辛尼保奴話：「正如我哋嘅教練所講，我哋嚟呢度係為咗改變心態。呢種自卑感，我哋需要擺脫佢。」
4強惡鬥法國，摩洛哥可唔可以繼續「發夢」？周四凌晨3點揭盅！
