「我覺得基奧特都踢得唔錯，但你期望佢可以攞到英超冠軍咩？」
2015年，阿仙奴名宿亨利，講波時提出以上問題，當時引起好多人共鳴，但就實實在在傷害咗基奧特。嗰個賽季，阿仙奴的確唔係英超冠軍，但足總盃決賽，基奧特有波入，協助球隊捧盃，聯賽亦射入19球，顯然唔係差勁表現，甚至稱得上係一份理想成績單。
難怪基奧特為此不滿：「我覺得自己已經做好工作，但受到質疑，我的確好嬲。」但一切已成過去，7年之後，基奧特喺2022世盃決賽周，4強戰前已射入4球，為法國國家隊共入53球，打破之前由亨利保持嘅紀錄。
已經36歲，真正大器晚成，越老越可愛。基奧特並非少年得志，24歲先至初嘗法甲滋味，加盟蒙彼利埃，翌年即成聯賽神射手，2012年獲得阿仙奴賞識，轉戰英超代替雲佩斯。
但由2012-13年球季効力阿仙奴起，至2018-2021年投身車路士，從來冇人認為基奧特係一級前鋒，佢喺英超後期已經常做後備；即使上屆法國成為世界盃冠軍，佢係主力成員，但所有功勞都歸於麥巴比，甚或基沙文。銀河唯一？只係好命水，全因賓施馬因為私生活問題不被挑選，佢先可以成為冠軍成員。
上季轉會AC米蘭，冇人估到，同一班年輕球員磨合後，基奧特會煥發新生，入球能力有所增強，門前把握力更加爐火純青，連入兩球反勝國際米蘭，成為球隊重奪意甲其中一個關鍵；更加重要嘅係，除伊巴謙莫域之外，佢已晉身成為紅黑軍團另一位精神領袖。
講乜都假，態度最重要，AC米蘭教練皮奧利對佢有以下評價：「基奧特心態最正面，永遠面帶笑容，盡力幫助隊友，球隊上下都愛佢。」無論邊個入波，佢同麥巴比，都會互相祝賀；對英格蘭頂入致勝球，基奧特亦向餵出靚波嘅基沙文，送上熱情讚美。
無論周四凌晨對摩洛哥戰果如何，可唔可以入決賽，法國衛冕成功與否，暖男大叔已贏取民心，期望最後一次世界盃，佢可以無憾離場。
