澳洲尋晚以1比0擊敗突尼西亞，中鋒米切爾杜基一箭定江山，成為今屆首位踢次級聯賽而又有入波嘅球員，做國家隊功臣以外，最重要係做囝囝心目中嘅大英雄。
31歲嘅米切爾杜基，喺知道入選國家隊以後，就即時同屋企人分享喜悅，佢仲話畀囝囝Jaxson聽，自己一定有波入。
究竟哪來的自信？杜基話：「作為一名前鋒，你需要有信心，相信你會喺每場比賽中得分，我就係咁同Jaxson講，最重要相信自己。」
「之後我就send短訊畀佢，話入波後，我會同佢分享喜悅，一齊慶祝。頭先我嗰個慶祝手勢係J字，代表Jaxson。我知佢有回應我，嗰一刻我睇唔到，但呢件事，我會終生珍惜同回味。」
其實當其時，身穿爸爸15 號波衫嘅Jaxson，喺看台上同樣做出個J字作回應。杜基履行咗對囝囝嘅承諾，而囝囝又有回應，成就呢個看似平凡而又Sweet爆嘅一刻。
杜基的確係好平凡，身高逾6尺，係傳統柱躉中鋒，球員生涯亦唔多順利，多於澳職打滾，最叻只係踢過清水心跳，舊年赴中東掘金失敗，轉戰日乙岡山綠雉。杜基為咗搵食，亦知道要妻兒不停短暫停留異鄉唔係辦法，所以佢老婆同囝囡就住喺英國。
爸爸踢世界盃咁威水，老婆當然帶埋對囝囡去卡塔爾打氣，不過杜基只能喺放假嗰陣陪一陪佢哋，不過都足夠溫馨，尤其加埋入波傳情嗰個moment。
杜基賽後話：「喺過去呢幾年，好多時我都係一個人，的確唔容易，不過擁有呢啲時刻(入波後互動)，一切犧牲都變得值得了。」
