摩洛哥歷史性打入世界盃8強，門將耶辛尼保奴、翼鋒薛耶治、保法爾、翼衛夏基美等等固然應記一功，但都唔好忘記佢哋背後嘅功臣：領隊利格古。
47歲嘅利格古，球員時代都係國腳，司職右閘，掛靴後做過摩洛哥助教，之前都係喺摩洛哥同卡塔爾聯賽教波。
2021年，係利格古事業嘅轉捩點，佢帶領摩洛哥勁旅韋達卡薩白蘭卡，成為聯賽同非冠盃雙料冠軍，由於佢個look有啲似，於是就多咗個花名：摩洛哥哥迪奧拿，亦由此時開始，摩洛哥國內對呢位少帥嘅期待越嚟越高。
而時任摩洛哥教練夏利荷錫，因為紀律問題同核心薛耶治不和，2月時，薛耶治亦早已明言退出國家隊，不過就喺世界盃開波前3個月，摩洛哥足總宣佈炒夏利荷錫，明顯係寧願保住薛耶治而換帥。
喺摩洛哥成為當紅主帥嘅利格古，順理成章接掌帥印，佢嘅第一個任務，當然係氹番掂性格巨星薛耶治，然後解決更衣室問題。
「好多人都話薛耶治好難搞，但我覺得只要畀多啲愛同信任，佢就願意為國家、為球隊拚死一戰。我自問畀咗佢，佢亦用表現作為回報。」
與其話佢似哥迪奧拿，利格古其實更似安察洛堤，懷柔手腕、政治家嘅演說，令到班球員為你仆心仆命。
摩洛哥今屆世界盃4戰，法定時間錄得2勝2和，最重要係只失1球，係目前8強中防守力最強嘅球隊，首名出線、歷史性入8強，表現令人眼前一亮，利格古絕對功不可沒。
