世界盃B組，英格蘭首戰霸氣狂炒伊朗6:2，另外一仗就冇咁多入波，但都張力十足，威爾斯最尾又係靠加里夫巴利救駕，以1:1逼和美國，級數即係級數，冇態一樣掂，冇得傾！
威爾斯相隔64年後再戰世盃，而今屆人腳亦真係幾強，前面哈利威爾遜、丹尼爾占士，中後場尼高威廉斯同賓戴維斯，早已相繼喺英超打響名堂，反而最令人擔心嘅係兩位老大哥巴利同艾朗藍斯，近季表現都係沉沉哋。不過佢兩個亦用行動話畀大家知，級數搭夠，唔使擔心！
甫開賽，美國即以喪跑戰術，佔盡優勢，威爾斯只能縮後伺機反擊，不過美國眾將年輕有活力、有質素，上半場36分鐘終於搵到缺口，基斯甸普列錫一個靚傳，名將之後添莫非韋亞冷靜射入，1:0完半場。
換邊後威爾斯㩒制，換入柱躉中鋒摩亞去停波做二傳，等一對翼巴利同威爾遜更多發揮空間，呢一著完全令形勢逆轉，威爾斯狂攻美國，最終都係靠巴利大哥博到12碼，然後再操刀中鵠，1:1完場。
33歲嘅巴利，離開皇馬後轉戰美職FC洛杉磯，狀態明顯仲未操起，唔係場場正選，但大賽巨星球員真係與生俱來，月初美職總決賽，去到補時7分鐘，FC洛杉磯仍然落後費城聯2:3，但就係後備登場嘅巴利頂入救命波，絕地逼和對手，之後FC洛杉磯靠互射12碼封王，巴利再一次成為救世主。
計埋之前附加賽，威爾斯亦係靠巴利一箭定江山、擊敗烏克蘭，得以再戰世盃，領隊羅拔比治亦都讚嘆：「加里夫巴利，從來冇令威爾斯失望！」
B組第二輪，威爾斯嚟緊星期五晚6點對伊朗，美國則於周六凌晨3點火併英格蘭。
