沙特阿拉伯上仗驚天反勝阿根廷，一眾將帥一夜間爆紅，尤其係主教練連納特，有型夠Cool，54歲，啲型佬味出晒嚟，其實連納特唔止得個樣，連個履歷表同半場訓話，都一樣咁型咁爆！
連納特係法國人，不過卻係一位非洲浪人。連納特踢波嗰陣司職後衛，效力過康城同一啲非職業球會，要靠做清潔幫補生計，不過連納特真係好聰明，佢做做吓清潔，都可以開到間清潔公司。球員生涯唔成功唔緊要，連納特對足球嘅熱誠，令佢轉執教鞭後，事業有突破性發展。
起初連納特都係教一啲低組別球會，亦試過去中超做體能教練，但佢真係堅敢搏敢試，2004年，遠赴越南執教南定FC，去到2008年，贊比亞國家隊向佢招手，連納特完全冇諗危唔危險，毅然前赴非洲追夢，亦由於佢嘅勇氣，幫佢打開咗非洲足球嘅大門。
連納特初接觸非洲波，就嘗試引入歐陸系統式訓練，當時普遍非洲球員都係體力強、部份有技術，但戰術執行性同紀律相對差，連納特將呢啲歐陸理念強勢執行，成功打造咗一支壓逼而有紀律嘅贊比亞，喺2012年，終於爆冷封王非國盃。
之後連納特輾轉執教科特迪瓦，再一次捧走非國盃，成為第一個帶唔同國家隊、都可以封王嘅主帥，2015年，佢終於達成心願，得到執教大球會里爾嘅機會，可惜成績未如理想，僅13輪聯賽就被炒。
連納特強項始終係帶國家隊，2016年，連納特再一次遠赴非洲，擔任摩洛哥主帥，仲成功喺外圍賽突圍，繼1998年後再戰世界盃，成為國民英雄，2019年轉教沙特阿拉伯至今，直至幾日前，再一次震驚世界。
沙特由完全捱打、半場落後0:1，到換邊後奇蹟反勝阿根廷，中間發生咗啲咩事，令沙特球員脫胎換骨？沙特落後阿根廷一球，老實講，好多主帥都寧願繼續守、輸少當贏都收貨，但連納特偏偏唔係咁諗。
沙特足總喺twitter po自爆片，講述球隊備戰、半場訓話情況等，連納特喺半場嗰陣原來係極度不滿，仲怒插班球員：「點呀，你哋上半場踢緊乜？呢個就係沙特式逼搶？你哋其實係嚟同美斯影相？」插到班球員口啞啞。
正正係呢種冇睇低班手足、相信球員嘅能力，連納特終於成就咗一場驚天逆轉勝。今晚沙特對波蘭，會唔會再一次帶來驚喜？
