英格蘭球星基亞利殊，今季成為網絡超紅人，每當紐卡素嘅阿米朗有好表現，基亞利殊就會出現喺hashtag入面，原因係佢曾經串串貢話「踢到成個阿米朗咁」，點知人哋今季大爆發，而佢自己喺曼城只係超級大後備。
不過，基亞利殊仍然入選世界盃大軍，分組賽首戰伊朗，佢後備登場斬獲入球，之後大跳開心蟲蟲舞，後尾嘅故事大家都知，呢隻舞係獻畀患有腦癱嘅小球迷芬尼費沙。
11歲嘅芬尼雖然患病，但一樣熱愛足球，偶像就係基亞利殊，芬尼經常寫信畀偶像，而偶像亦會親筆回信，更送上簽名波衫，原因係基亞利殊嘅19歲妹妹Hollie，同樣患有腦癱症，所以佢感同身受，對同樣患病嘅芬尼關顧有加。
1個月前，基亞利殊同贏得殘障足球賽冠軍嘅芬尼見面，當時佢就應承芬尼，只要一入波就會跳開心蟲蟲舞，但佢亦都自嘲：「但我今季入得1球咋……」
不過唔緊要，去到世界盃，基亞利殊成功兌現佢嘅承諾，跳完開心蟲蟲舞第二日，基亞利殊仲視像芬尼氹佢開心，芬尼話：「我鍾意你嗰球入波呀！」基亞利殊話：「吓，你唔係鍾意我嘅慶祝動作咩？依家你好出名喎！」芬尼童言無忌：「我以為你會唔記得……」
芬尼一夜爆紅，佢早兩日上BBC節目，期間更透露幾乎因病，錯過基亞利殊為佢準備嘅慶祝動作：「我朝早整親隻腳要去醫院，等咗兩個鐘，我大嗌放我走呀、放我走呀，好彩，我最終喺開波前10分鐘趕到返屋企。」
對基亞利殊有咩感覺？芬尼話：「當你遇到你嘅偶像，感覺就好似見到蝙蝠俠或者超人咁。」每個人都有自己心目中嘅Super Hero，你可能就係你囝囡心目中嘅超人、父母眼中嘅蝙蝠俠。
一陣英格蘭對美國，基亞利殊可唔可以再帶畀芬尼歡樂？
