年紀僅差歲半、同樣踢左閘、齊齊入選國家隊，盧卡斯靴南迪斯同菲奧靴南迪斯，注定要不斷地被比較，今屆世界盃，更加係兩人百感交集嘅一屆……
法國首場分組賽對澳洲，9分鐘，大佬盧卡斯喺禁區外拉傷，被澳洲馬菲歷基有機可乘，殺入禁區再傳交奇治葛雲，澳洲先開紀錄。盧卡斯唔單止孭鑊，仲證實右膝十字韌帶撕裂，提早結束今屆世界盃。
入替盧卡斯嘅，係細佬菲奧。菲奧一落場，隨即有個靚傳中助攻，拉比奧特頂入，為法國掀起反勝序幕，最終法國大勝澳洲4:1，而菲奧亦越戰越勇，上場更射入靚波，成為法國晉身決賽嘅關鍵功臣。
盧卡斯同菲奧，喺馬體會青年軍時期，並非龍兄虎弟，大佬只係踢咗一季B隊，就被提拔上一隊，跟手做埋主力。2018年，22歲嘅盧卡斯首次入選國家隊，世界盃時期更加係正選左閘，高舉大力神盃；2019年，更以破球會紀錄轉會費，8000萬歐元加盟拜仁，巨星之路快過火箭。
至於細佬菲奧，從未為馬體會一隊披甲，然後轉投皇馬坐冷板凳，直至2019年去AC米蘭，先有穩定嘅上陣時間，從而喺2021年首度入選國家隊，但因為有哥哥喺度，菲奧都係後備居多。
不過，澳洲一役後命運逆轉，菲奧取代哥哥後，5場世界盃賽事有1入球、2助攻，場均2.6次攔截成功、1.4次解圍成功，攻守均頭頭是道。
二人嘅爸爸桑靴南迪斯，亦係足球員，曾經效力圖盧茲、馬賽、馬體會及華歷簡奴等等，不過喺04年就拋妻棄子走咗佬（雖然之後蒲頭揭開真相、見下集），兩兄弟由細到大都同媽媽相依為命，所以三人感情極好，根本唔存在任何比較、妒忌。
「我依家係為咗哥哥而戰。我知佢傷勢好嚴重，我更加要加把勁，踢埋佢嗰份，為佢戰鬥，捧走世界盃。」
