摩洛哥雖然喺4強敗走，以0:2不敵法國，但晉級路上一路砌低比利時、西班牙同葡萄牙，歷史性晉級4強，開創非洲足球歷史，已令球迷拍案叫絕。
摩洛哥爆紅，功臣當然多不勝數，目前幾位球員包括中場保拿希及岩拉伯特、翼鋒保法爾、門將邦奴等等，甚至連教頭利格古，都受到歐洲豪門關注，當中岩拉伯特（sofyan amrabat）更喺4強戰令麥總冇啖好食，聲名大噪。
今場波，司職防中嘅岩拉伯特多次同麥總短兵相接，速度係唔夠你快，但勝在死纏爛打毅力爆燈，下半場一球鍥而不捨狂追麥總，然後剷到佢成個飛起、波砵都爛埋，更成為今屆世界盃經典場面之一，有入場睇波嘅法國總統馬克龍，賽後走入摩洛哥更衣室，大讚岩拉伯特係今屆最佳中場。
26歲嘅岩拉伯特，目前效力意甲費倫天拿，同佢哥哥洛甸岩拉伯特（Nordin Ambarartt）一樣喺荷蘭出世，父母都係摩洛哥人，岩拉伯特兩兄弟都踢過荷蘭U21，但二人最終係選擇效力摩洛哥。
哥哥洛甸目前踢緊希臘AEK雅典，上屆兩兄弟都有份入選摩洛哥踢世界盃，可惜洛甸嘅代表作只係對住鏡頭講「VAR is Bullshit」，國家隊喺分組賽出局，而出線嗰兩隊就係葡萄牙同西班牙，洛甸更被傳媒喪插唔夠班。如今細佬獲廣泛認同，晉級過程中亦踢走雙牙，總算幫哥哥爭番口氣。
有報導指岩拉伯特嘅死纏爛打風格，引嚟西甲馬體會主帥施蒙尼同巴塞嘅沙維注意，岩拉伯特受訪嗰陣話：「同巴塞、馬體會扯上關係係我嘅光榮，不過我係費倫天拿球員，要尊重番球會。」
