3年時間，改變大到難以想像，一個城市、一位巨星，可以突然從高峰滑落，能唔能夠重返巔峰？曾經嘅世三夏薩特，坦白話畀大家知，好難喇。
夏薩特4年前率領比利時勇奪世界盃季軍，係當時嘅天之驕子。2019年6月7號，夏薩特轉投皇家馬德里，惡夢正式開始，傷患纏身、復出無態、齋坐冇得踢，然後不斷Loop，到目前為止，夏薩特只曾為皇馬於西甲上陣51次，入4球……
雖然狀態曳到咁，但夏薩特依然憑名氣入選世界盃大軍，惹嚟唔少比利時球迷不滿，上星期熱身賽輸畀埃及1:2，夏薩特正選踢咗71分鐘，表現完全唔合格就預咗，最離譜係佢個肚腩飛晒出嚟，相當難睇，難怪賽後被球迷圍插。
呢位31歲嘅比利時隊長，早前接受訪問嗰陣大方承認，冇可能踢番以往嘅水準：「老實講，2018年嘅高峰已經過咗去，我唔可以去返呢個水平喇。我喺精神同肉體上，已遭受太多苦難，所以我唔怕講，呢件(從高峰滑落)唔係一件羞恥嘅事。」
有評論認為，夏薩特勇於坦白，可能係一件好事，至少佢知自己去到邊個水平，從而作出踢法調整，為國家隊作出貢獻。夏薩特自己都話：「只要我身體情況許可，我仍然可以做一啲偉大嘅事。」
比利時今晚深夜尾場會對加拿大，領隊馬天尼斯喺賽前已經打開口牌，前鋒盧卡古因傷缺陣，而隊長夏薩特將會正選登場。
