克羅地亞殺入世界盃4強，摩迪絕對係關鍵功臣，仲有利華古域、佩列錫、高華錫……等等，全部表現均超水準，不過千祈唔好數漏佢，20歲左腳中堅加華度爾。
上屆以半冷門身份勇奪亞軍，克羅地亞今屆再次爆冷殺入4強，今屆比上屆冷嘅主因，係因為一班主力已經老咗4歲，但意外地呢班老將冇走下坡，而且仲有新星接班頂上，以至戰力比上屆不遑多讓。
上屆中堅組合，係洛夫雲同維達，不過二人已屆33歲，速度成為弱點，今屆換上加華度爾拍洛夫雲，呢對一老一嫩拍檔出奇地夾，鐵血聯防比利時一役，仍為球迷津津樂道。
有睇格仔軍嘅球迷，都見到呢位面罩俠超大隻，Marking、攔截、預判、速度以至靈活性，根本唔似一個20歲年輕人，最重要係佢相當識玩，勇而不茅，今屆5場都係正選，但一張黃牌都冇攞過，絕對有齊晒世界級後衛嘅所有條件。
20歲嘅加華度爾，目前踢緊德甲RB萊比錫，佢爸爸曾經效力業餘球會，對個仔嘅足球天份驚為天人，7歲就帶咗佢去NK Tresnjevka受訓，3年後，加華度爾就轉投薩格勒布戴拿模，18歲已成為球會主力，攞埋聯賽冠軍，一直到2021年以1800萬鎊跳去萊比錫。
今屆世界盃，加華度爾畀人印象最深嘅比賽，應該係對比利時，場內佢滿場飛連環攔截，完場後獲得出線權，佢仲激動到跑去觀眾席隔離，攬住媽媽爆喊。
克羅地亞教練達利話：「當我見到呢個情景，覺得好溫暖。我恭喜佢媽媽，教出一個孝順、謙虛、有教養嘅仔。」
目前多間歐洲豪門都對呢位中堅虎視眈眈，估計佢目前嘅身價至少8000萬鎊。克羅地亞名將奧歷話：「每個人都喺度講緊佢，歐洲所有豪門都識得佢，佢絕對係一位非凡嘅天才。」
