故事由一封信開始：
「卡斯（Case），仲記唔記得你第一次上陣？當時你好鬼緊張，我仲叫你冷靜啲，我諗緊點搞！嗰一刻無人料到往後嘅發展，你真係變咗一個領䄂。我哋一齊贏咗好多錦標，就算遇上壓力，甚至我哋犯錯，你一直都係咁正面。只要想起呢啲歡樂時光，我內心就會感到平和。你係世界上最好嘅保鏢，我會好掛住你，但願你好運。好似你咁專業，又有咁好性格，朋友，你應得嘅！」
呢封信，係卡斯米路今季初加盟曼聯時，皇馬拍檔莫迪歷寫畀佢嘅情書，送別好友入面所講嘅呢場波，係2013年4月20號，卡斯米路首次為皇馬一隊上陣，對手係貝迪斯。
當年嘅細佬不斷成長（卡斯比摩笛細7歲），兩人同德國嘅卻奧斯，組成皇馬著名中場鐵三角，贏過5屆歐聯、4季西甲、3次世冠盃及歐超盃。
差不多十年，無數冠軍、深厚情誼。
周五晚11時，8強第一擊，克羅地亞對巴西，呢對好兄弟將要正面對撼，兩個只能活一個。莫迪歷，37歲，依然係世一中場指揮官，克羅地亞仍然圍繞佢運轉；卡斯米路，30歲，越趨成熟，無疑係一級防中，極具大哥風範，令尼馬等巴西攻擊球員，無後顧之憂。
位置使然，大戰之夜，必定會埋身對撼。為國家隊榮譽，暫時放低兄弟之情，踢一場轟轟烈烈嘅好波，待完場笛聲響起，再盡情擁抱吧！
