日本反勝西班牙，堂安律後備登場建功，成為國家英雄。佢賽前承諾，日本會修補東京奧運4強傷痛，唔會再輸畀西班牙，「利己主義者」，果然説到做到。
24歲，日本媒體稱佢為「馬納堂安」，當然亦有「日本美斯」例牌稱號，真係好濫，通街都係。但堂安律的確係天才，16歲已升上大阪飛腳一隊，打破J League最年輕登場球員紀錄。
同好多決賽周日本國腳一樣，堂安律現時効力德甲弗賴堡，反勝德國之役，堂安律已射入關鍵扳平一球，對西班牙佢照辦煮碗先入波，効力杜塞爾多夫嘅田中碧入奠勝球，兩個外流德國球員，合力搞死德國。
堂安律成為繼稻本潤一、本田圭佑、乾貴士等大前輩後，日本隊史上單屆世界盃能射入2球之人。佢賽後表示，今仗結果證實，佢哋之前打敗德國，唔係外界所謂嘅僥倖：「贏埋西班牙，日本民眾就會相信第一場能贏德國唔係奇跡，而係必然勝利。」
點解堂安律係「利己主義者」？又同日本漫畫有關，今次唔係《足球小將》。係近年幾Hit嘅足球漫畫《藍色監獄》（Blue Lock），內容同今屆日本國家隊息息相關，當中堂安律完美實踐漫畫所講嘅「利己主義」。
《藍色監獄》係金城宗幸原作，野村優介作畫，故事描述日本足球聯盟為咗贏世界盃，發起名為「藍色監獄」計劃，將國內頂級選手集合進行集訓，透過「利己主義」觀念及競技訓練，培養出以自我為中心嘅世界第一攻擊手。
在決賽周開始前，日本隊10號南野拓實曾經獲《藍色監獄》作者邀請進行訪問，南野指出隊中最「利己主義」球員係堂安律，認為呢位攻擊中場唔似日本人，思路好清𥇦，更似德國人，並且極希望爭取入球。堂安律對德國及西班牙取得重要入球，證明南野睇法正確。
16強日本再發起挑戰，死拼上屆亞軍克羅地亞，堂安律將同莫迪歷展開較量，「利己主義者」奔向8強之路，絕不停步。
