大癲！又係比寧咸！周六晚西甲國家打吡，皇家馬德里喺落後一球嘅情況下，換邊後比寧咸又連入兩球，當中包括一球世界波，作客以2:1反勝巴塞隆拿，力壓神奇黑馬基羅納重登榜首位置。
連埋呢兩球，比寧咸今季喺西甲10戰入9球，各項賽事總計13戰入13球兼有3次助攻，一舉打破C朗當年加盟皇馬首13場嘅入波紀錄，但唔好忘記，比寧咸係一名中場！今次佢唔單止征服班拿貝，更征服埋魯營， 以一己之力帶領皇馬作客反勝巴塞。
巴塞今仗稍為變陣，將阿拿奧祖移到右閘，簡些路則推前擔任右翼，與費蘭托利斯、祖奧菲歷斯攻堅，羅拔利雲度夫斯基先列後備。皇馬同樣星光熠熠，洛迪高、雲尼素斯拍住上，比寧咸繼續做後上殺手。
開賽僅6分鐘，根度簡吼中阿拿巴同曹亞文尼嘅誤會，把握機會先開紀錄，終於拎到佢加盟巴塞後首個入波。皇馬攻力麻麻，上半場連中龍埋門都冇。
不過下半場安察洛堤先後換入卡馬雲加、摩迪同荷西路，皇馬終於有起色，並喺68分鐘，由比寧咸25碼抽入世界波追成1:1。補時階段，摩迪助攻，比寧咸後上、門前冷靜射入，皇馬絕殺巴塞2:1。
經過呢場咁刺激嘅打吡之後，皇馬11戰28分，並以較佳得失球力壓神奇黑馬基羅納重登榜首，領先第3位嘅巴塞4分。
喺英超入波當食生菜嘅夏蘭特，要聽晚先登場鬥曼聯，佢亦都有趁得閒睇國家打吡，更忍唔住出po激讚比寧咸！夏蘭特cap咗比寧咸起腳嘅片，然後配上caption：unreal this guy！
