【西甲】麥巴比官宣 做皇馬新Icon;獲偶像C朗感人留言:期待你閃耀巴拿貝!

「輪到我做觀眾喇,期待你閃耀巴拿貝球場!」

剛贏得歐聯冠軍嘅皇家馬德里,周一再宣布喜訊,官宣免費簽入法國巨星基利安麥巴比,雙方簽約5年。皇馬上一個icon係C朗,麥巴比加盟,無疑係傳承呢個地位。轉會消息公布後,麥巴比喺社交媒體貼上少年時同C朗嘅合照,仲獲得偶像感人留言。

皇馬高處未算高,本身已有雲尼斯奧斯同洛迪高高斯呢對前場孖寶,加埋麥巴比,真係不得了。幾乎唔記得講,巴西神童安迪歷亦會喺暑假加盟,皇馬呢條新鋒線,平均年紀夠晒輕,計卡士亦冠絕全球,仲未計有英格蘭新王祖迪比寧咸嘅後上絕殺!

過去幾年,都不斷盛傳麥巴比會離開巴黎聖日耳門,完成兒時夢想加盟皇馬,不過始終未成事。直至今個夏天,麥巴比終於離開。據報,麥巴比年薪係1,500萬歐羅,並有1億5,000萬歐羅簽紙費,分5年收取。