'

【西甲】魔笛不老!莫迪歷精彩傳射 皇馬輕取切爾達  卡斯米路接班人大爆發!

36歲345日,莫迪歷魔笛再追魂!中場大師以一個世界波再加精準長傳助攻,帶領皇馬作客4:1擊敗切爾達。精彩表現,連對手領隊都要向佢起立致敬。

皇馬開季二連勝,賓施馬12碼先開紀錄,切爾達追平後,嚟到莫迪歷個人表演時間,42分鐘一個靚絕遠程世界波,令皇馬再度領先;56分鐘又放出致命長傳,造就雲尼斯奧斯祖利亞射成3:1;費達歷高華維迪射入最後一球。

魔笛除貢獻入波同助攻,全場45次傳球,43次成功,當中4次成功長傳,兼有1次搶斷,交出亮麗數據,77分鐘被換出場時,連切爾達領隊高迪都特別起立,向老將致敬。

今仗係卡斯米路轉會曼聯後,皇馬首場比賽,佢同莫迪歷、卻奧斯合組完美三中場,立下豐功偉績,捧盃無數,4次歐聯、3次西甲,各項賽事共16個冠軍,鑄入皇馬隊史,如今拆夥,係一個時代終結。

皇馬新時代中場線,莫迪歷擔當定海神針外,更喜見新星閃亮。新加盟嘅超新星曹亞文尼,被視為卡斯米路接班人,今仗亦有絕佳表現,3次解圍、3次攔截、3次過人、9次搶得控球權,交出全場最佳個人數據。

曹亞文尼22歲,8,000萬歐元由摩納哥來投,正係有呢位準超級防中,皇馬先至放心畀卡斯米路離隊。今仗佢同另一年輕人卡馬雲加加上莫迪歷老少配,效果相當唔錯。未來會唔會係另一個完美三中場?只要莫迪歷繼續逆時間而行,唔係冇機會㗎!