'

【西甲】馬體球迷狂唱種族歧視歌 焫㷫火爆打吡!皇馬9戰全勝 創逾50年紀錄

肥安功力,唔到你唔服!「銀河艦隊」喺安察洛堤麾下,引爆無盡潛力,即使王牌射手賓施馬缺陣,但依然能夠作客以2:1力剋馬體會,創下9連勝、平咗超過50年嘅紀錄!

馬德里打吡一向激到爆,今場亦唔例外,尤其馬體會球迷今場大唱種族歧視歌曲,不斷揶揄洛迪高高斯、雲尼斯奧斯祖利亞等球員,焫㷫球場氣氛,馬體會嘅佐治高基,一開波更嚟個辣招攔截,引爆雙方衝突。

「30分鐘先生」基沙文今場竟然正選,馬體會都算落重本,而基沙文平均表現亦唔曳,不過對手皇馬實在太弗,18分鐘,近期狀態大勇嘅洛迪高高斯同曹亞文尼配合入楔,洛迪高高斯順勢一抽開紀錄。

去到36分鐘,雲尼斯奧斯射門中柱,近期頻頻入波嘅華維迪及時趕到,門前執雞成功,拉開到2:0。之後皇馬保持控球優勢,直至83分鐘,靴莫素為馬體會追成1:2,但到補時階段,呢位入球功臣兩黃一紅被逐,最終維持1:2完場。

連埋歐超盃同歐聯,皇馬開季9戰全勝,係目前歐洲5大聯賽中,唯一全勝球隊,皇馬對上兩次9戰全勝,係1961/62同1968/69球季,呢兩季佢哋都成功封王西甲,無論從往績同表現去睇,今季皇馬再度衛冕嘅機會都幾樂觀。