'

【西甲】金球獎前夕 賓施馬入波預祝攞獎!皇馬國家打吡3:1挫巴塞 羅拔仔1碼炒高O晒嘴

賓施馬勢必成為金球獎得主,頒獎禮前,收到另一份大禮。周日西班牙國家打吡,呢位王牌射手先開紀錄,帶領皇家馬德里主場3:1擊敗巴塞隆拿,一報上季次循環慘敗0:4之仇。

金球獎頒奬禮將於香港時間周二凌晨舉行,賓施馬得獎可謂毫無懸念。佢今仗表現,亦完勝羅拔利雲度夫斯基,金球獎得主,絕對係當之無愧。

賓施馬12分鐘開紀錄後,費達歷高華維迪喺35分鐘,以一個靚絕射門,擴大紀錄至2:0。呢位24歲烏拉圭攻擊中場,水準不斷提升,已成為皇馬重心之一。

費倫托利斯83分鐘追成1:2,但洛迪高高斯90分鐘搏得12碼,親自主射入網,皇馬贏到3:1,9戰8勝1和得25分,領先巴塞3分居榜首,連埋歐聯,今季仍然不敗。

前皇馬門神卡斯拿斯,賽後盛讚安察洛堤,將皇馬打造成一支全面而高效嘅球隊。高效的確係事實,全場8次射門,已有4次中龍門,當中3個轉化成為正式入球,仲有賓施馬一個詐胡。

反觀巴塞,13次攻門換一個入球,繼續有攻勢冇實際,其中羅拔仔上半場一次剷射,竟然離門一碼剷高,睇到沙維眼都突埋。

沙維近期壓力大,歐聯好大機會分組賽出局,球會將唔見好大筆錢,國家打吡又輸埋。比賽之後,「沙維落台」又成為熱搜,皇馬球迷喺勝局已定時,仲大叫「沙維留低!沙維留低!」明寸只要沙維一日係領隊,巴塞都會畀皇馬食住。

肥安型到~