'

【西甲】肥安又玩「老將新用」!今次目標:重施故技、拯救夏薩特

皇馬功勳主帥安察洛堤,一向被公認為政治手腕最勁嘅教頭,喺佢領軍下,極少出現內部不和嘅傳聞,唔少老將、又或以為高峰期已過嘅球員,就係喺呢個純追求競技嘅環境底下大爆發,肥安功力堅唔講得笑。

遠嘅唔講,近呢兩季最明顯例子,就一定係愛華頓年代嘅占士洛迪古斯、以及金球獎大熱賓施馬,咁嚟緊嗰季,又會係邊個?

隨住求購麥巴比失敗,新季皇馬嘅前鋒組合同上季分別不大,而上季都見到,一旦賓施馬受傷、又或被完全凍結,皇馬就會死晒火,喺冇新鋒將嘅情況下,肥安打算「出絕招」,將啲舊將捽番醒。

2019年,夏薩特由車路士轉投皇馬後,受傷多過踢波,狀態一沉不起,喺皇馬3季,上陣66次只入6球,但喺呢段期間,皇馬拎咗兩次西甲冠軍、1次歐聯冠軍,簡單啲講,夏薩特根本係可有可無。

點樣將一條咸魚捽到翻生?根據西班牙《阿斯報》報導,安察洛堤選擇博一博,安排夏薩特踢正前鋒!

事實上,賓施馬年事已高,而且新季中間會夾雜世界盃,必須要有一個替補分擔吓賓施馬嘅壓力,隨住盧卡祖域即將離隊,如果唔買人的話,夏薩特就係「賓施馬二號」嘅理想人選,畢竟夏世三喺車仔最後一季,亦經常性做「假9」,聯賽37次上陣入16球,效率唔曳。

如果夏薩特健健康康,話唔定真係可以喺肥安指導下咸魚翻生!