英超因英女皇駕崩而暫停，球迷們將目光集中喺其餘四大聯賽，當中巴塞作客卡迪斯一戰，最終巴塞贏4:0，不過賽果唔係重點，呢場波嘅真正英雄，係卡迪斯門將列迪斯馬。
巴塞喺上半場只能同卡迪斯摸和，去到55分鐘，法蘭基迪莊打破僵局，之後後備上陣嘅羅拔利雲度夫斯基射成2:0，去到82分鐘，看台上出現突發情況，有球迷心臟病發暈倒、賽事暫停，氣氛凝重，場中有球員為球迷祈禱，而卡迪斯門將列迪斯馬，就即刻跑去後備席，接住巴塞軍醫掟出嚟嘅AED（自動體外除顫器），然後再狂奔去出事地點，將AED拋向觀眾席，助醫護人員盡快急救。
比賽暫停接近55分鐘後重開，巴塞之後由安素法迪、迪比利建功，入多兩球，大勝4:0完場。賽果次要，重要係卡迪斯會長賽後透露，患病球迷得到治療後，暫時無生命危險。
FIFA其後轉載列迪斯馬狂奔嘅短片，大讚佢係「場內場外真英雄」，英國媒體更指佢係「聖人守門員」，至於頭5輪西甲入6球、打破C朗紀錄嘅羅拔利雲度夫斯基，則喺IG出po，用列迪斯馬接實AED嘅相，加咗句caption：「今夜不只是足球。」
