近季一直被外借嘅「敗家仔」摩拉達，喺新季西甲首戰終於爭番啖氣，梅開二度，助馬德里體育會作客大勝基達菲3:0，難得威番鋪，摩拉達賽後開腔，希望留喺馬體會，而馬體會教練施蒙尼亦想佢留隊，傳聞中有意收購摩拉達嘅曼聯，會唔會再一次食檸檬？
摩拉達轉投馬體會後，近兩季都被外借至祖雲達斯，表現平均嚟講唔算太差，但佢門前失機嘅次數仍然唔少，今季被馬體會收回己用，始終蘇亞雷斯離隊，馬體會今季可選擇嘅正箭頭唔多，前晚對基達菲，摩拉達可以話係一吐烏氣。
開賽14分鐘，摩拉達接應菲歷斯傳波，喺禁區外左腳熨射得手，打開紀錄。59分鐘，又係呢對好拍檔，菲歷斯質入禁區，摩拉達窄角度勁射破網，2:0。去到75分鐘，又係菲歷斯助攻，今次輪到基沙文食胡，3:0完場。
摩拉達喺賽後表明，希望留番喺馬體會，主帥施蒙尼亦開腔力撐：「摩拉達好謙虛，佢嘅態度同狀態都係一流，球會上下都想佢留隊，不過我只係教練，我唔係球會老闆。」
施蒙尼咁講係有弦外之音，多間西班牙及英國傳媒均指，曼聯諗住用佢頂替C朗，而馬體會亦對C朗有興趣，距離轉會窗死線仲有兩星期，最終兩會會唔會有驚天交易？真係要拭目以待喇。
