佢真係天才，同時又係玻璃腳。安素法迪後備出場，即時玩晒，令巴塞隆拿扭轉劣勢，作客4:1大勝皇家蘇斯達。羅拔利雲杜夫斯基西甲首度入波，仲要一嚟就兩球，34歲生日最佳禮物。
巴塞開鑼戰主場賽和華歷簡奴，羅拔仔冇料到，但射手即係射手，今戰皇蘇開波僅1分鐘，羅拔佬就接應柏迪傳送，近門射成1:0。
皇蘇繼續重用久保建英，同大衛施華、阿歷山大伊沙克合作攻堅，就係呢個組合，5分鐘合力製造扳平入波。法蘭基迪莊論論盡盡，畀久保建英迫甩腳下球，大衛施華乘機放直線，伊沙克接應射成1:1。
上半場算均勢，皇蘇多少少攻門機會，久保建英、大衛施華老少矮仔好活躍，傳送到位，亦有射門機會，但未能製造入球。
下半場初段，皇蘇仍較主動，仲食咗個詐胡。但巴塞64分鐘一個調動，令局面徹底改變。玻璃天才安素法迪，出場只有兩分鐘，即用後腳交出靚傳，奧士文尼迪比利射成2:1；再兩分鐘後，佢又做助攻，由羅拔佬擴大紀錄。79分鐘安素法迪自己入波，為巴塞射成4:1完場。
仲係19歲，安素法迪能傳能射，總係同人有啲唔同，真正天才球員，但可惜同時又係玻璃腳，已有兩次重傷紀錄，可唔可以成為新美斯，仲要睇佢自己造化喇。
