【西甲】有情有義!皇馬助荷西路圓掘金夢 先買斷合約 再0差價賣畀卡塔爾 贏盡讚賞

皇馬尋晚官方宣佈,買斷愛斯賓奴借將荷西路嘅租借合同,正式將呢位大器晚成嘅西班牙國腳收歸旗下。不過,西班牙多間媒體表示,皇馬隨後就會以原價,賣荷西路去卡塔爾豪門艾加拉法。

舊年夏天,皇馬由愛斯賓奴租用荷西路,令唔少球迷驚訝,究竟一位踢降班隊嘅前鋒,有冇資格着上銀河艦隊嘅波衫?結果荷西路出場49次入18球,並助攻3次,喺歐聯更一手拯救皇馬,令球隊成為最終冠軍。

喺租借合約中,皇馬有買斷權,金額為150萬歐元。到上季結束後,皇馬就想啟動買斷條款,球員本人亦同意留低,不過,財大氣粗嘅卡爾塔球會艾加拉法介入,年紀唔細嘅荷西路決定變卦離隊,希望把握機會去掘最後一桶金。

皇馬雖然表示惋惜,但都理解球員嘅決定,並主動提出啟動買斷條款,以免愛斯賓奴阻撓或抬價,再用原價賣番畀艾加拉法,冇賺取任何差價。皇馬呢個舉動,受到西班牙球迷讚賞,認為球會有情有義。