【西甲】摩拉達戴帽都要輸…基羅納4:3激贏馬體會 主帥米曹:終於有回報!

超級黑馬繼續神奇!西甲黑馬基羅納歇完冬後依然有火,尋晚以4:3激贏馬德里體育會,喺聯賽榜同皇馬叮噹馬頭,拋離巴塞同馬體會10分,繼續衝擊冠軍!

主場嘅基羅納,喺開賽後僅兩分鐘,就由中場華利尼費蘭迪斯開紀錄,不過西班牙國腳摩拉達今仗光芒四射,12分鐘後就突破越位、幫馬體會扳平。基羅納火力十足,加上馬體會防線犯錯,其後沙維奧同戴利白蘭特各入一球,將比數拉開至3:1。

摩拉達亦不甘示弱,喺完半場前及換邊後分別建功,幫馬體會扳平3:3。眼見呢場比賽即將和氣收場,基羅納鋒將伊雲馬田,喺補時1分鐘個人表演,於4位馬體會球員夾擊下,仍可殺入禁區、人叢中射門得手,助基羅納絕殺馬體會4:3。

艾雲馬田絕殺得手。

近9次交手,基羅納係首次擊敗馬體會,而呢支「神奇黑馬」近11場聯賽豪取9勝2和,賽後與同日贏波嘅皇家馬德里一樣19戰得48分,喺榜首並駕齊驅,而皇馬暫憑較佳對賽成績力壓基羅納。皇馬同基羅納目前已拋離第3位馬體會、第4位巴塞隆拿10分。

基羅納主帥米曹賽後受訪時仍相當激動:「今晚係一個歷史性嘅晚上,我哋球員嘅堅韌不屈,即使落入下風仍頑强拼搏,終於得到回報!我對一切都好滿意!」

米曹向主場球迷致謝。

至於入咗3球、球隊仍然輸波嘅馬體會神鋒摩拉達,亦大讚基羅納有料:「(戴帽卻輸波?)冇辦法,恭喜基羅納,這就是足球。我哋輸咗,其他嘢根本唔重要。我哋冇時間去後悔,嚟緊仲有好多比賽,我哋要好似以往咁企番起身,向下一個勝利進發。」