【西甲】戲劇性慘敗!3:5不敵維拉利爾 沙維宣佈教埋今季走人:做巴塞教練好殘忍!

沙維教埋今季離隊!今晨西甲,巴塞主場戲劇性3:5慘敗予維拉利爾,繼西班牙盃、超級盃出局後再經歷慘敗,目前已落後榜首皇馬10分,沙維飽受批抨,佢喺賽後亦正式宣佈今季完結後離任:「做巴塞隆拿教練,係一份好殘忍嘅工!」

巴塞今場用菲歷斯做正選,同也馬、利雲度夫斯基合組三叉戟,但佢哋後防實在太曳,上半場已被謝拉特摩蘭奴先開紀錄,戰至54分鐘,簡些路失誤,被艾哥馬治射成2:0。

巴塞一度落後兩球。

落後兩球下巴塞終於瞓醒,根度簡吹起反擊號角,先追成1:2,之後柏迪建功扳平,71分鐘,根叔開罰球,艾歷拜利擺烏龍,令巴塞一度反超前3:2,但估唔到劇情反轉再反轉,巴塞防線又出事,基捷斯喺右路射入遠柱,追平3:3,補時巴塞繼續失誤,蘇諾夫建功反超前4:3,加上荷西摩拉利斯埋齋,維拉利爾最終贏巴塞5:3。

巴塞早前先喺西超盃決賽1:4不敵皇馬、西班牙盃2:4輸畀畢爾包,嚟到今場又輸3:5,以21場45分排第3,與榜首皇馬相差10分。Opta數據,今仗係巴塞1963年主場1:5輸畀皇馬後,第一次喺西甲主場被轟入5球或以上,又刷新數據。

沙維賽後喺記者會宣佈:「我會喺6月30日離開巴塞隆拿。我哋已經到咗無辦法返轉頭嘅地步,作為巴塞球迷,我知道球會需要轉變,我認為自己係時候離開……有人問我會唔會係巴塞嘅費格遜,但我想講,做巴塞教練係一份好殘忍、好唔開心嘅工,好多人會攻擊你,直到你辭職為止。」

44歲嘅沙維,喺2021年11月離開卡塔爾球會艾薩特,回歸巴塞救亡,頂替之前搞到一鑊粥嘅朗奴高文,沙維喺嚴重嘅財政問題下,上季領軍重奪西甲冠軍。