【西甲】奧巴美揚 羅拔佬再續前緣!當年佢兩個喺多蒙特有幾勁?

羅拔佬一直盛傳會加盟巴塞,但傳咗幾個月,巴塞都喺度玩嚟玩去,煩膠程度僅次法蘭基迪莊嘅轉會消息。

不過去到凌晨,呢單嘢終於有突破性進展,Fabrizio Romano報導,羅拔佬日內就會同巴塞簽約,而個人條款其實早喺二月嗰陣就已經傾好晒,合約為期三年,今次轉會費連埋附加條件,拜仁將會袋番5000萬歐元。

巴塞恃住自己個夢幻招牌,今夏不停進行煩膠式轉會操作,係成功嘅,但同時令好多球迷覺得好反感,有錢買人、冇錢出糧,但唔好理,至今已有基斯爾、基斯坦臣、拉芬夏同羅拔佬4位新主力來投,亦即意味巴塞要再賣人(踢走人)或又再逼球員減薪,迪比、巴夫韋迪等肯定冇得留低,而盛傳原本都喺清洗之列嘅奧巴美揚,卻因羅拔佬加盟,反而有彎轉。

2013年,奧巴美揚由法甲聖伊天轉投多蒙特,喺高普指導下展開佢嘅巨星路,嗰季佢同羅拔佬合作,成為歐洲最煞食組合,羅拔佬47戰入28球,奧巴47戰16球,極度誇張,雖然始終贏唔到拜仁,但歐聯8強、兩項亞軍同捧走德超盃,成績都算係咁,而二人亦成為惺惺相惜嘅老友。

一年後,羅拔佬去咗拜仁,佢同留效多蒙特嘅奧巴美揚,都同時進入調整期,當季德甲神射手畀法蘭克福嘅阿歷山大美亞攞咗,但適應期過後,羅拔佬即刻拎番隻金靴,之後就輪到奧巴拎,而奧巴隨後轉投阿仙奴,羅拔佬就繼續留喺德甲,連奪5屆神射手。

時隔9年,奧巴美揚已33歲,羅拔佬亦即將踏入34歲,呢對老將組合仲有冇火花㗎?羅拔佬喺拜仁每一季都拎冠軍,375次披甲入344球,歐聯佔86球,入球數字拍住賓施馬,僅次C朗、美斯,而以為好快收工掘金嘅奧巴美揚,去到巴塞全面重生,17場聯賽入11球,呢對昔日黃金拍檔,去到巴塞體系後能否複製9年前嘅光輝,令唔少球迷相當期待。