有馬體會，幾時都有火爆場面睇，周一凌晨主場對巴塞隆拿，自然亦唔例外，唔單止打摔角、扯頭髮，連偷桃揸袋毒招都出埋。
雖然羅拔利雲杜夫斯基停賽，巴塞仍然憑奧士文尼迪比利上半場入波，小勝1:0，以16戰41分，續居榜首，領先皇馬3分，皇馬今輪作客1:2負維拉利爾。
馬體會全場13次射門，全面壓倒巴塞，但基沙文、祖奧菲歷斯都冇料到，全失3分後，只得27分排第5，已落後巴塞14分。
馬體會主帥施蒙尼，出名為求勝利，乜招都出，唔會虛偽扮君子，今仗未開波已做嘢，故意淋濕球場，影響以地波推進為主嘅巴塞。
巴塞球員躁晒，成場波都同馬體會埋牙，場面火爆，去到補時終於火山噴發。費倫托利斯畀馬體會中堅史提芬沙域從後攔截後，兩個攬埋一舊開拖。
費倫托利斯攻上面，起勢扯頭髮，史提芬沙域更毒，揸住對手春袋唔放，場面火爆又核突。雖然佢哋知道玩大咗，好快冷靜自動分開，仍雙雙被趕出場。由於太難睇，波監期數有可能好長，4至12場都唔出奇！
講番啲正能量球員，皇家蘇斯達作客2:0贏艾美利亞，32分繼續排第3。比賽當日，正係大衞施華37歲生日，而且仲有波入，又一超級長青樹，無限致敬！
