究竟係咩驅使一個原本好有「信仰、理念」嘅人，變成不擇手段搵著數、恩將仇報嘅hihi？係窮呀，dnkh！唔係講緊香港偽人，講緊巴塞隆拿啫。
巴塞多年前唔會喺波衫心口賣廣告，因為佢哋覺得巴塞係加泰隆尼亞象徵，仲曾言「你會唔會喺國旗賣廣告吖？」直到2007年為unicef破例，一分不收之餘，仲掉番轉每年贊助unicef 150萬歐元，喺當年，唔少球員同球迷都覺得，巴塞就係咁有型，係一種信仰、理念。
多年過去，情懷早變，為生存，咩都可以變賣，都算喇，但唔少球迷都覺得巴塞開始冇底線，一而再再而三逼球員減薪、逼走近乎義工嘅功臣，又再都算喇，最爆係拖欠球員薪金，但同時又有錢買人，即係明刀明槍係「有錢呀，但唔鍾意出糧畀你，吹咩？」真係令球壇嘩然。
拜仁主帥拿高斯文，都忍唔住跳出嚟寸爆巴塞：「巴塞隆拿，係世界上唯一一間冇錢而又可隨心所欲買人嘅球會，成件事好奇怪、癲狂，我唔知佢哋點樣做得到。」
巴塞一路爭緊法蘭基迪莊1700萬歐元人工，不過基斯爾、基斯坦臣先後免費來投，先唔計經理人佣金同簽字費，淨係6500萬歐元買拉芬夏、5000萬歐元簽羅拔利雲度夫斯基，已經燒咗近10億港紙，咁都未夠喉，轉會權威Fabrizio Romano更證實，巴塞準備收購維拉超新星卓胡美卡（Carney Chukwuemeka），預計轉會費為2000萬鎊。
卓胡美卡係今屆英格蘭U19歐國盃冠軍功臣，亦係謝拉特重點提拔嘅新人王，但呢位18歲球員只剩一年約，而喺轉會消息傳出後，卓胡美卡拒絕續約，維拉同謝拉特見佢去意已決，都無謂阻人發達，為佢標價2000萬鎊，今夏熱身賽都冇預佢。
據報導指，早前阿仙奴、多蒙特都表示有意出手，但隨住巴塞又再放風，暫時卓胡美卡都係屬意加盟巴塞，堅吹漲，即管睇吓之後事態發展會係點啦。
