法蘭基迪莊入「魔」、羅拔利雲度夫斯基同拉芬夏轉投巴塞講咗成個月，每日都有新消息，一時話傾掂數、一時又話已落實、一時又話係非賣品，真心煩到嘔。呢3單超煩膠交易，「咁啱」巴塞都「牽涉」在內，乜真係咁啱咩？
之前巴塞喺巴杜姆執政下，瘋狂以天價喪簽唔等使球員，令巴塞財政陷入絕境，佢下台後，留下一個超級爛攤子畀拉波塔，當然，拉波塔本身唔嘢少，身兼政客、律師、資本家於一身，政治手腕同財技一流，慢慢將巴塞帶返正軌。
不過，所謂非常時期嘅非常手段，中間個過程，就唔係咁多人接受得到。
賣魯營冠名權、開放畀球迷搞婚禮逐樣收費、賣埋未來25年西甲轉播權嘅10%，都叫ok，開源之餘梗要節埋流，逼走美斯係上季嘅事，退一萬步當唔計數，今季就先炒近乎係收最低工資、一心返嚟救駕嘅丹尼爾，然後再勸碧基退休或解約，再準備嚟一鑊大減薪，開刀對象又係布斯基斯、佐迪艾巴呢啲王朝遺臣！
點解用個「又」字？因為計埋今次，已經係第3次減薪，第一次所謂疫情停擺、第二次係拍硬檔幫手註冊新球員，上得床嚟掀被冚，唔爭在減多次啦！
至於法蘭基迪莊，堅畀巴塞玩到透，好明顯拉波塔就睇住佢同曼聯嚟食，先話同意放人，然後再話迪莊係非賣品、擡高個價，跟手再逼迪莊二揀一，一係減薪留隊，一係去曼聯，無論迪莊點揀，贏家都係巴塞。
羅拔佬就仲慘，巴塞放晒風話斟介，搞到佢同拜仁反晒面，拜仁已預咗放人，買文尼返嚟頂佢個位，點不知拉波塔竟然話尊重羅拔佬係拜仁球員，多謝佢對巴塞嘅厚愛！真係難聽過粗口！可憐羅拔佬被跣鑊甘，依家騎虎難下，點都要離開拜仁㗎喇……
而巴塞另一目標拉芬夏，出價傳聞係同車路士一樣，但咩都分期，畀經理人迪高嘅錢更少一大截，不過拉芬夏同迪高一樣視巴塞為首選，吹咩？有球評家甚至認為，巴塞放風斟拉芬夏都係煙幕嚟，目的係逼奧士文尼迪比利減4成人工留隊。
隨住基斯爾同基斯坦臣免費來投，巴塞嚟緊又要清人或減球員人工，先可以幫上述二人註冊，究竟嚟緊拉波塔又會出咩那渣招？
巴塞恃住自己個招牌夠吸引，不停進行「地獄級操作」，有唔少巴迷表示理解，「商業」世界係咁㗎啦，但更多巴迷係覺得心寒，不禁問拉波塔：「究竟球會仲有冇底線？」
