阿根廷翼鋒迪馬利亞，世界盃冠軍功臣之一，曾經扶助過兩大球王C朗同美斯，淨係呢兩大功績，都夠佢喺沙特賺番一大筆，不過，「天使」就偏偏唔吼佢哋開出嘅天價人工，選擇重返成名地賓菲加。
迪馬利亞連續兩季成為自由身，上季佢揀咗加盟祖雲達斯，僅僅過咗一年，又要再次面臨抉擇。隨住沙特金元足球捲起風暴，加上迪馬利亞上季表現唔錯，免轉會費，但卻有8個入球、7次助攻，所以佢今季即使已屆35歲，但選擇卻比上季更多。
除咗祖雲達斯已開出續約條件，亦有沙特聯賽嘅肥約，美職都有唔少球隊畀offer「天使」，包括美斯效力嘅國際邁亞密。班主之一嘅碧咸，希望呢對阿根廷冠軍拍檔繼續拍住上，既爭佳績，亦令商機更加多。
不過，迪馬利亞嘅最後答案，係葡超班霸賓菲加。迪馬利亞出身於阿根廷球會羅沙里奧中央，2007年獲賓菲加招手，踏出成名第一步，轉投呢支葡萄牙班霸。
迪馬利亞喺賓菲加打響名堂，3季上陣124場，攻入15球、斬獲28次助攻，然後被皇馬睇中收歸旗下，之後到曼聯、PSG、祖雲達斯，換句話說，迪馬利亞之所以名成利就，某程度上都係源於賓菲加嘅賞識。
迪馬利亞並無忘記提拔之恩，佢今次拒絕晒其他合約，明顯係想趁自己仲未大幅滑坡，為賓菲加出一分力。
況且，賓菲加會長雷哥斯達，曾經同迪馬利亞並肩作戰；而目前賓菲加嘅隊長，係阿根廷國家隊隊友奧達文迪，佢同「天使」Friend過打Band，二人極力游說下，迪馬利亞最終選擇同賓菲加簽約一年，出年先再諗掘金。
賓菲加上季重奪失落咗3季嘅聯賽冠軍，但預計嚟緊會有唔少當打猛將被撬走，包括喺世界盃大放異彩嘅干卡路、前阿積士翼鋒拿尼斯等等，影響不少。
