【英足盃決賽】曼城創造歷史時刻 貝拿度告別戰?唔怕曼聯被睇死 坦克搬數據壯膽

英格蘭足總盃決賽,一陣10點溫布萊球場爆發,曼城可唔可以成為史上首支成功衛冕聯賽及足總盃球隊?要贏曼聯,其中一個關鍵人物,將會係貝拿度施華,今仗亦好可能係呢位葡萄牙國腳,最後一次為藍月亮上陣。

季前已有傳貝拿度會離開曼城,最終佢選擇留低。但貝拿度合約至2026年夏天屆滿,而佢合約中包括5,000萬鎊解約金。據報巴黎聖日耳門有意喺今夏向曼城買斷貝拿度合約,代替離隊嘅麥巴比,故今仗有機會係貝拿度最後一次披藍月戰衣。

賽前貝拿度拒絕回應轉會傳聞,只強調要擊敗曼聯、創造歷史:「做到前人未曾做到嘅事,係好大嘅動力,我哋好想創造歷史,足總盃係志在必得。我哋係一支競爭力好強嘅球隊,同市打吡對球迷嚟講係大件事,但我哋球員只當係一場普通比賽,加上去年決賽贏過曼聯,信心更加大。」

除上屆決賽,曼城今季英超兩戰曼聯亦全勝,首循環作客輕取3:0,次循環主場勝3:1,今仗於溫布萊再交手,自然被全面睇好。

曼聯雖然被睇淡,但領隊坦哈格把口,永遠可以反擊,佢賽前搬埋數據,話曼聯有機會捧盃:「上季賽果冇得變,但我哋分析後,球隊表現比曼城更好。我有數據,除咗控球率,其他各項幾乎都係我哋更好。前場心臟地帶、創造入球機會,所有數據都比曼城好。」